Stil-stil Stormers-held
2010-05-20 08:16
In-diepte Verslae
Die Western Force het die Lions tydens hul Super-rugbywedstryd by die NIB-stadion in Perth geklop.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad – Die probleem met die Stormers, het ’n wyse man ’n klompie seisoene gelede gesê, is dat hul losskakel Bash heet en die nr.4-slot se bynaam Ghost is, terwyl ’n man dit eintlik andersom sou wou hê.
Sedertdien het die Stormers se vaste vyf hardebaard gekry en met die slotte wat deesdae meer stampe en stote uitdeel as wat hulle ontvang, het die losskakel wat as Bash bekend staan self as die ware Jakob ontluik.
Peter Grant bly ’n aanwins in die fisieke aspekte van die spel, maar daar is darem ook ’n subtiele dimensie aan die Stormers-onderkaptein se spel wat ’n mens laat glo hy gaan vanjaar ’n paar toetse speel.
“Peter is die onbesonge held in die span. Hy doen sy werk stil-stil, maar is baie doeltreffend. Sy vermoë om agterlangs te organiseer, is besonder goed,” sê die Stormers se breier, Allister Coetzee. Grant meet hom Saterdag teen die Waratahs se Wallaby-ster Berrick Barnes in die Super14-halfeindstryd hier.
Barnes is ’n puik spelskepper en as stelskopper is sy rekord vanjaar 35 uit 47 vir ’n slaagsyfer van 74%. Grant spog met 42 uit 52 (81%) en naas die Brumbies se Matt Giteau (51 uit 61, 84%) is hy die man wat die beste pale toe korrel in 2010 se Super14-reeks.
Goeie stelskopwerk in 2009 het juis vir Morné Steyn die Springbok-deur oopgemaak.
“Die Bokke is nie iets waarop ek vanjaar al werklik gefokus het nie. Ek het al ’n proeseltjie gehad en sal graag nog wil kry,” sê Grant.
“My fokus is om goed vir die Stormers te skop. Met die span wat goed vertoon, sien ons nou hoe individue presteer.
Stelskopwerk het my al in die verlede gekelder. Ek het daaraan gewerk en dit gaan goed, maar dis in die groot wedstryde wat dit werklik gaan tel.
“Ek was ’n bietjie bekommerd toe ek vroeër vanjaar weer die skopwerk moes oorneem, want ek het nie eintlik harder as vantevore daaraan geoefen nie. In die eerste paar wedstryde het ek egter niks mis geskop nie en ek was self verbaas.”
Die Stormers se agterlyn-afrigter, Robbie Fleck, wou Grant aanvanklik vanjaar as binnesenter inspan, maar ’n vroeë besering aan Willem de Waal het die plan omvergewerp.
“Een fout verlede jaar was dat ons te veel op die verdediging ingestel was en nie genoeg punte kon kry nie. Ons het hard gewerk om die balans in ons spel reg te kry,” sê Grant.
Die Stormers en Waratahs se spanne is onveranderd behou.
Bly op hoogte van al die jongste sportnuus deur Nuus24Sport op Twitter te volg.
- Sport24