Steyn het nou 1 000 Super-punte in visier
2011-02-10 09:27
In-diepte Verslae
Allister Coetzee, wat uit verskeie oorde gekritiseer is oor Jebb Sinclair se insluiting, het sy soektog na 'n oorsese losvoorspeler laat vaar.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Nee, hy tel nie sy getal agtereenvolgende suksesvolle skoppe nie. Elke volgende poging word benader asof dit die eerste van ’n rugbywedstryd is.
Só sê Morné Steyn, die grootste puntemasjien die afgelope jaar of twee in Superrugby. Hy benodig vanjaar slegs 243 punte om die eerste Suid-Afrikaner te word wat 1 000 punte in dié reeks aanteken.
“Ek hoor net soms daarvan. Soos verlede jaar toe ek 41 skoppe of só iets ná mekaar oorgeskop het. Dit is beslis nie iets wat in my kop rondmaal as ek aanlê pale toe nie,” sê dié vriendelike speler van die Bulls.
Slegs twee spelers, Dan Carter (1 078) en Stirling Mortlock (1 019), het al die 1 000-kerf verbygesteek. Omdat daar vanjaar minstens vier wedstryde meer is, kan Steyn ook daardie kerf haal. Hy het verlede jaar 263 punte in dié reeks aangeteken – die meeste deur ’n speler in enige seisoen in Super Rugby.
Steyn se vier skepdoele is ’n rekord vir die meeste skepdoele in ’n wedstryd. Hy hou ook saam met Andrew Mehrtens die rekord vir die meste skepdoele in Super Rugby, naamlik 17.
Mehrtens, Carter (twee keer) en Steyn is die enigste spelers wat tot dusver 200 punte in ’n reeks kon aanteken.
Op welke wyse Steyn dié reeks onlangs oorheers het, word in perspektief geplaas as ’n mens in ag neem dat slegs drie ander Suid-Afrikaners meer as 500 punte in Super Rugby kon aanteken. Hulle is Louis Koen, André Pretorius en Peter Grant.
Maar steeds rus Steyn nie op sy louere nie. Hy skaaf elke dag op Loftus se B-veld aan sy skopwerk. Volgens die skop-afrigter Vlok Cilliers kan Steyn se werketiek duidelik in die statistiek gesien word.
“Ek moet soms bontstaan as ek hom toets. Dikwels werk ek oefeninge uit waarvolgens hy stelselmatig beter moet skop. Maar dan skop hy van meet af alles oor. Dan moet ek vinnig nuwe roetines uitwerk om ’n uitdaging aan hom te stel,” sê Cilliers.
“Morné se harde werk in oefeninge is beslis ’n les vir enige voornemende stelskopper. Hy werk ook hard aan sy taktiese skopwerk. Dis ’n belangrike jaar vir Morné en dit lyk of hy ’n goeie seisoen gaan hê.”
Bly op hoogte van al die jongste sportnuus deur Nuus24Sport op Twitter te volg.
- Sport24