Spelers kies Keegan as Sharks se kaptein
2012-01-17 07:01
In-diepte Verslae
Die Western Force het die Lions tydens hul Super-rugbywedstryd by die NIB-stadion in Perth geklop.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg – Keegan Daniel is die Sharks se kaptein vir die Super-rugbyseisoen en Bismarck du Plessis sy adjudant.
John Plumtree, die Sharks se afrigter, het Maandag gesê Daniel het hom beïndruk met sy leierseienskappe in verlede seisoen se Curriebeker-reeks.
“Dit was glad nie ’n maklike seisoen nie met verskeie beserings en ook die Springbokke wat teruggekeer het.
“Ek dink hy het baie goed gedoen om alles te hanteer.”
Hy het dit duidelik gemaak dat Daniel nie in al die wedstryde sal speel nie, met Du Plessis wat dan die kaptein sal wees.
Volgens Plumtree was Daniel die spelers se keuse as kaptein.
“Keegan gee sy alles op die veld en hy geniet die agting van die spelers.
“Hy verdien nie net om kaptein te wees nie, maar is ook ’n baie gewilde keuse.
“Hy is ook ’n baie vriendelike mens en ek het hom verlede seisoen sien groei as kaptein.
“Daarom is dit belangrik dat hy die kans kry om daardie groeiproses verder te voer.
“Die belangrikste is dat hy die steun van die spelers het.
“Hulle is trouens die ouens wat vir hom as kaptein gestem het en jy kan nie ’n beter getuigskrif as dit kry nie,” het Plumtree gesê.
Net soos Daniel, stel Du Plessis die voorbeeld met sy vertonings op die veld.
“Bismarck is takties ook baie uitgeslape en ek is gretig om te sien hoe hy sal groei in ’n kapteinskapsrol,” het die afrigter gesê.
“Hulle is albei baie mededingend en is Sharks deur en deur met ’n liefde vir die trui.
“Hulle lei deur hul voorbeeld en ek glo dit sal aansteeklik inwerk op hul spanmaats.
“Hulle is manne van min woorde, maar baie aksie op die veld en dit is die belangrikste.”
– Sport24
– Bly op hoogte van al die jongste sportnuus deur Nuus24Sport op Twitter te volg