Spelbreker Sarel in Lions se visier
2011-05-06 10:28
In-diepte Verslae
Die Western Force het die Lions tydens hul Super-rugbywedstryd by die NIB-stadion in Perth geklop.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - As die Lions vandag ’n manier kan vind om Suid-Afrika se beste spelbreker in 2011 se Super Rugbyreeks hok te slaan, is ’n sege in hul wedstryd teen die Cheetahs ’n groter moontlikheid.
Só belangrik was die Cheetahs-skrumskakel, Sarel Pretorius, se invloed op sy span se welslae dat die meeste spanne nou in hul voorbereiding probeer om ’n teenvoeter vir hom te kry.
Pretorius se agt drieë tel vir 36% van sy span se drieë in 2011 se reeks. Om sy invloed verder in perspektief te stel: geen ander Cheetahs-speler het vanjaar al meer as twee drieë gedruk nie.
Hoewel sy onvoorspelbaarheid soms dalk ook sy eie spanmaats onkant betrap, kan niemand kla as só ’n individualis bo-aan die reeks se lys van driedrukkers is nie.
John Mitchell, afrigter van die Lions, erken Pretorius is ’n gevaarman, maar het hier gesê sy span sien daarna uit om die lewensaar van Cheetahs-drieë af te knip.
Mitchell het juis besluit om ’n ander skrumskakel in te span en die vurige Rory Kockott is vandag die man in die saal.
Soos vir die vorige kragmeting tussen die Lions en die Cheetahs, waarin die Lions met 25-20 in Bloemfontein geseëvier het, is Kockott bo Jano Vermaak ingesluit.
“Ek wil hê Jano moet slordige besit beter hanteer en ook die verdediging beter organiseer. Ek was nie gelukkig met Jano se spel teen die Chiefs nie,” het Mitchell oor die skuif gesê.
Kockott bied sy span iets nuuts en dié oudspeler van die Sharks huiwer ook nie om op eie inisiatief te probeer om ’n verskil te maak nie.
Met Vermaak wat sy plek kwyt is, kan Kockott nie vir ’n beter kans vra om ’n gereelde plek in die beginspan los te speel nie.
Vir sy span is dit ook ’n kans om hul diep teleurgestelde ondersteuners met ’n tuisoorwinning te troos.
Om dit te vermag, is geen maklike taak nie, want die Lions moet ’n verloorgewoonte oorkom én ’n Cheetahs-span in ’n opwaartse kurwe stuit.
* Die spanne is:
Lions: Michael Killian, Lionel Mapoe, Dylan des Fontain, Doppies la Grange (k), Deon van Rensburg, Burton Francis, Rory Kockott, Warren Whiteley, Josh Strauss, Cobus Grobbelaar, David de Villiers, Wikus van Heerden, Kevin Buys, Edgar Marutlulle, JC Janse van Rensburg. PLAASVERVANGERS: Martin Bezuidenhout, Patric Cilliers, Franco van der Merwe, Michael Rhodes, Jano Vermaak, Elton Jantjies, Jaco Taute.
Cheetahs: Riaan Viljoen, Phillip Burger, Robert Ebersohn, Corné Uys, Ryno Benjamin, Sias Ebersohn, Sarel Pretorius, Davon Raubenheimer, Ashley Johnson, Heinrich Brüssow, Wilhelm Steenkamp, Francois Uys, WP Nel, Adriaan Strauss (k), Coenie Oosthuizen. PLAASVERVANGERS: Ryno Barnes, Lourens Adriaanse, Waltie Vermeulen, Kabamba Floors, Tewis de Bruyn, Naas Olivier, Hennie Daniller.
Skeidsregter : Craig Joubert. Afskop : 19:10.
Vir die jongste sportnuus volg Nuus24Sport op Twitter.
- Sport24