Soweto verwelkom Bulls
2010-05-21 06:37
In-diepte Verslae
Die Western Force het die Lions tydens hul Super-rugbywedstryd by die NIB-stadion in Perth geklop.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Retha Grobbelaar, Beeld
Zwelethu Gamede (28) het Donderdag stokkies gedraai by die werk sodat hy ’n spesiale verwelkomingsboodskap in Soweto vir die Bulls kon verf.
Gamede, ’n grafiese ontwerper, was Donderdag besig om die Bulls-embleem op die muur van sy ateljee langs die Orlando-stadion te verf.
Die Bulls speel Saterdag in dié stadion teen die Crusaders in ’n Super14-halfeindstryd.
Gamede gaan die woorde “Welcome to Soweto Vodacom Bulls” op die muur verf.
“Ek dink dit is ’n wonderlike gebaar om hulle te verwelkom.
“Die Bulls het al Bafana ondersteun.”
Gamede, ’n vurige Bulls-ondersteuner, gaan môre in die stadion wees.
“Ek is so opgewonde. Dit is die eerste keer wat ek die Bulls in ’n stadion gaan sien,” het hy gesê.
“Ons het soveel negatiewe opskrifte in die koerante. Ons het meer positiewe goed nodig.
“Ek weet mense is skepties oor Orlando, maar hulle het niks om voor bang te wees,” het hy gesê.
Floyd Sibanda (36), ’n Beeld-werknemer, het gesê oud en jonk is opgewonde.
“Mense kan nie wag vir Saterdag om hul gasvryheid aan spanne en toeskouers te toon nie. Die opwinding is so groot dat mense in taxi’s en sjebiens meer oor die rugbywedstryd praat as oor Bafana Bafana se kanse in WB 2010.”
Volgens Ratang Tanyane (23) moes kaartjies goedkoper gewees het.
“Rugby is ’n wit sport. Mense in die township beskou dit nog as vreemd. Die Bulls gaan dit egter nou nader aan die mense bring.”
-Beeld
Volg Beeld op Twitter