Skudding kan rugby beïnvloed
2011-02-23 08:55
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Teen Dinsdagaand was daar nog geen sekerheid oor watter impak die verwoestende aardbewing in Christchurch, Nieu-Seeland, op die Super Rugby-reeks gaan hê nie.
Die Crusaders, die suksesvolste span in Super Rugby-geskiedenis, is in dié stad geleë.
Hoewel daar die naweek nie ’n wedstryd in die AMI-stadion daar plaasvind nie, kan die Crusaders se wedstryd in Wellington – teen die Hurricanes – en die Chiefs se besoek aan die Highlanders – in Dunedin – om menslikheidsredes in die gedrang wees.
Die Blues speel in Durban teen die Sharks.
Andy Colquhoun, Saru se kommunikasiehoof, het aan Sport24 gesê daar is nog geen rugbybesluite in daardie verband deur Sanzar gekommunikeer nie.
“Dit is verstaanbaar, aangesien baie mense dood is. Ons verwag dat daar in die lig van ál die trauma vir 48 uur nie daaroor gepraat sal word nie,” het Colquhoun gesê.
Die Crusaders was Dinsdag by hul oefenveld toe die aardbewing plaasgevind het. Van die spelers was in die stort en het met net hul handdoeke na veiligheid gevlug.
Sanzar se uitvoerende hoof, Greg Peters, het aan rugby365.com gesê die naweek se wedstryde gaan voorlopig voort.
Hy het wel gesê sy “hoogste prioriteit” is om vas te stel of die “rugbyfamilie” geraak is.
“Gegewe die omvang van die skade, sal die spelers op die een of ander manier geraak wees – hetsy direk of deur familiebetrokkenheid,” het Peters gesê.
Die Bulls se kaptein, Victor Matfield, het aan J.J.Harmse gesê: “Ons het baie vriende onder die Crusaders-spelers, en ’n mens kan maar net hoop dat hulle veilig is.
Ons word altyd op ons hande gedra as ons in Christchurch kom en dit is ontstellend om te dink dat daardie mense nou in nood verkeer.”
Die Crusaders is veronderstel om volgende naweek op hul tuisveld teen die Waratahs te speel.
Die AMI-stadion is in die vorige aardbewings van September beskadig. Of dit weer die geval is, is nog nie bevestig nie.
Christchurch moet later vanjaar ook sewe Wêreldbeker-rugbywedstryde, waarvan twee kwarteindstryde is, aanbied.
Die Internasionale Rugbyraad het in ’n verklaring gesê dit sal “onvanpas” wees om nou kommentaar te lewer oor Nieu-Seeland en veral Christchurch se status as Wêreldbeker-gasheer.
Bly op hoogte van al die jongste sportnuus deur Nuus24Sport op Twitter te volg.
- Sport24