Skrumskakel-krisis tref Lions
2012-02-01 09:18
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg. – Die Pumas-skrumskakel Tian Meyer oefen nou ook saam met die Lions se Super-rugbygroep met twee van dié streekspan se skrumskakels wat mank langs die kantlyn sit.
Ross Cronjé en Whestley Moolman, wat in die buite-seisoen as aanwinste van onderskeidelik die Haaie en die Luiperds deur die Lions gelok is, gaan straks ’n paar weke langer weens beserings buite aksie wees.
Cronjé sukkel met ’n vingerbesering en Moolman het las van sy haksening.
Michael Bondesio is sedert Jano Vermaak se vertrek na die Bulle die nommereen-skrumskakel in die Goudstad.
Hy was die enigste skrumskakel in die Lions se groep vir Vrydag se wedstryd teen die Stormers in Kaapstad, wat die Lions met 6-28 verloor het.
Bondesio was wel een van die Lions se beste spelers, maar die vraag oor wie sy adjudant gaan wees, is nog onbeantwoord.
Die senter Doppies la Grange kan as noodgeval agter die oond waarneem, maar dit is kwalik ’n kans wat in Super-rugby gewaag kan word.
Meyer (23), wat in Durban skoolgegaan het, speel die afgelope twee seisoene vir die Pumas waar hy as veelsydige speler gebruik word.
Hy speel hoofsaaklik skrumskakel, maar die Pumas-breier, Jimmy Stonehouse, span hom soms ook as senter in.
By die Lions het hy hom by twee ander Pumas-spelers in die groep, die losvoorspeler Doppies le Roux en die slot Marius Coetzer, aangesluit.
Die Lions het Dinsdagoggend in versengende hitte kwaai onder hul afrigter, John Mitchell, se bevel gesweet en ’n lang drafsessie om die atletiekbaan by die Johannesburg-stadion met ’n verskeidenheid stoei-oefeninge voortgesit.
Terwyl die losskakel Elton Jantjies sonder enige ongemak saamgeoefen het, was daar geen teken van die senters La Grange en Dylan des Fountain nie.
La Grange is effe olik en Des Fountain het een van sy knieë teen die Stormers beseer.
Hy kan ’n geruime tyd buite aksie wees.
Die Lions se volgende voorseisoense wedstryd is eers op Dinsdag 14 Februarie teen die Kings in George, maar Mitchell kan dalk ’n verswakte span Suid-Kaap toe te stuur.
Mitchell het ná sy span se nederlaag teen die Stormers sy misnoeë uitgespreek oor die moontlikheid dat die Kings ’n verswakte span vir die Lions-wedstryd mag kies.
Tog sal dié wedstryd voort- gaan, selfs al het Mitchell glo gesê hy weet nie of ’n wedstryd teen ’n verswakte teenstander die moeite werd is nie.
Dit is die Lions se enigste oorblywende voorbereidingstryd alvorens hul Super-veldtog op 25 Februarie teen die Cheetahs begin.
Vir die jongste sportnuus volg Nuus24Sport op Twitter.
– Sport24