Skerp Spies vir Bulls
2010-03-09 10:20
In-diepte Verslae
Allister Coetzee, wat uit verskeie oorde gekritiseer is oor Jebb Sinclair se insluiting, het sy soektog na 'n oorsese losvoorspeler laat vaar.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
J.J. Harmse
Pretoria - Daar wag ’n nuwe reeks uitdagings op die Bulls in die volgende paar weke van die Super14-rugbyreeks, het hul afrigter, Frans Ludeke, gesê.
Eers is daar – die eerste keer in vanjaar se reeks – ’n Nieu-Seelandse teenstander en dan moet die Bulls hulle begin regmaak vir hul oorsese verpligtinge.
“Die twee wedstryde teen die Brumbies en Waratahs was taai, maar ons berei beslis anders voor vir die Kiwi-spanne.
Hulle vra meer van jou verdediging en is meer direk en jy moet bedag wees daarop,” het Ludeke gesê nadat die Bulls Maandag weer saamgetrek het ná hul loslootjie.
Die breier was baie tevrede met wat hy gesien het.
“Ja, die breek het ons goed gedoen. Die ouens met klein, lastige beserings het dit afgeskud en almal se koppe is weer vars.
“Ons het die seisoen sodanig beplan dat die Waratahs-wedstryd die eerste fase van die reeks afsluit,” het hy gesê.
“Dit beteken dat almal nou weer met ’n nuwe fokus terugkom, sonder om die basiese beginsels agterweë te laat. Ons is egter redelik geseënd op die oomblik en almal is fiks en lus vir speel.”
Ludeke sal waarskynlik nie veel aan sy span torring nie, hoewel ’n fikse Pierre Spies weer agtsteman behoort te speel en saam met Dewald Potgieter en Deon Stegmann die lostrio kan wees.
Volgens Ludeke gaan die Highlanders besliste uitdagings aan die Bulls stel.
Die span het ook nog nie vergeet hoe sleg hulle deur die Kiwi’s in verlede jaar se kragmeting in Palmerston North afgeransel is nie.
“Hulle was een van die min spanne wat ons verlede seisoen behoorlik van ons voete gespeel het. Daar is dus nie enige kanse dat ons hulle gaan onderskat nie. Die afgelope naweek se uitslae het weer gewys hoe straf die reeks kan wees,” het Ludeke benadruk.
Intussen het die Bulls se Springbok-skrumskakel, Fourie du Preez, gesê dit is teleurstellend dat Jimmy Cowan nie die naweek teen hulle gaan speel nie.
Hy het een van sy vingers teen die Stormers ontwrig en is reeds terug Nieu-Seeland toe. Jamie MacIntosh sal Saterdag die Highlanders aanvoer.
“Ja, dit is jammer vir hulle. Hy is immers die huidige All Black-skrumskakel en hulle kaptein. Jy kon sien die span het effens verslap nadat hy van die veld af is, maar sy plaasvervanger, Sean Romans, het daarna goed gedoen. Hy is ’n goeie speler en kan Cowan se plek vol staan,” meen Du Preez.
Dié Bulls-staatmaker het sy spanmaats groot laat skrik toe hy tydens Maandag se oefensessie ’n enkel seergemaak het.
Hy het tydens ’n opwarmoefening skeef getrap en is hinkepink van die veld.
“Ek het groot geskrik, maar gelukkig is die besering nie ernstig nie. Ek meen ek sal weer môre (Dinsdag) kan oefen,” het Du Preez gesê.
Daar was ook goeie nuus vir die Blou Bulle se Vodacombeker-span.
John Mametsa is vroeër in Kaapstad onskuldig bevind dat hy ’n boorvat uitgevoer het.
Hy is ná die Bulle se wedstryd teen die Pumas uitgewys.
Dit wil ook lyk of die Bokke Akona Ndungane en Chiliboy Ralepelle volgende week hulle terugkeer tot rugby sal maak.
Minder goeie nuus is die enkelbeserings van Gerrit-Jan van Velze en Dries van Schalkwyk.
- Volksblad