Sharks sal nare gewoonte moet afleer
2011-06-15 10:02
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Die Sharks sal Saterdag op Loftus Versfeld iets moet vermag wat hulle nog selde die seisoen in die Super Rugby-reeks kon doen as hulle ’n bra onwaarskynlike sege oor die Bulls wil behaal.
Dit is om op die veld én op die telbord van die afskop af saam met die Bloues te gesels.
Die Sharks se onvermoë om glad deur die ratte te beweeg vandat die fluitjie die eerste keer geblaas het, is een van die hoofredes waarom die span nou in die laaste week van die ligawedstryde in die penarie sit om op Loftus te móét wen om te oorleef.
Die Sharks sukkel al heel seisoen om hul stempel af te druk.
Al sedert hul kragmeting met die Crusaders op Twickenham het die Sharks die gewoonte om met die omdraaislag in die moeilikheid te wees en te moes terugveg vir al wat hulle werd is.
Teen die Crusaders, Bulls, en twee keer teen die Stormers, kon hulle dit nie regkry nie.
In hul tuiswedstryde teen die Brumbies, Waratahs en die Hurricanes, asook weg teen die Cheetahs en Lions, was dit eers in die laaste 40 minute wat die Sharks wakker geskrik en die spel gelewer het wat van hulle verwag word.
Die afrigtingspan sal planne moet maak om dié probleem reg te stel, anders is hul seisoen iets van die verlede.
“Jy moet goed begin én eindig en dit moet tussenin ook redelik goed wees,” het die Sharks-breier, John Plumtree, aan Sapa gesê. “Ons het as ’n groep daaroor gepraat (om gedurig te moet terugveg).”
Plumtree het gesê sy span het nie té veel gesukkel in die Hoëveld se dun lug toe hulle Saterdag hier teen die Lions gelykop (30-30) gespeel het nie.
“Ons het sover in die eerste 15 tot 20 minute gesukkel en dan het dit beter geraak. Maar ons kan dit nie teen ’n gehalte-span soos die Bulls bekostig nie. Dus moet ons seker maak dit gebeur nie hierdie week nie.”
Plumtree-hulle sal moet toesien dat die Sharks op die aanval ’n verrassingselement behou, selfs al val die groot fokus daarop om die Bulls voorlangs te tem. Plumtree erken die Bulls sal as gunstelinge uitdraf, maar die Sharks is vasbeslote om te veg vir ’n plek tussen die voorste ses spanne: “Ek is seker ons is nie die gunstelinge nie, maar ons het baie om te verloor.
“Ons wil nie op die telling tussen die Waratahs en die Brumbies staatmaak nie. Ons wil Loftus toe gaan en goeie rugby speel. As ons ons strategie regkry en seker maak al die ander faktore, soos lugdruk en ons toewyding is onder beheer, sal ons hulle ’n goeie tweestryd gee.”
Vir die jongste sportnuus volg Nuus24Sport op Twitter.
- Sport24