Sharks reg om te byt
2011-06-21 08:16
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Durban – “Al is ons hóé lief vir die vrouens in ons lewens is ons baie bly om nie hierdie week by die huis te wees nie.”
Stefan Terblanche, die Sharks-kaptein en senter, sê hy en sy spelers wil vandeesweek nêrens anders as in Nieu-Seeland wees nie in ’n poging om die Crusaders se opmars na die Super Rugby-titel te probeer stuit.
“Die wedstryd teen die Bulls kon baie maklik ons laaste gewees het en dan sou ons hierdie week met vakansie gewees het.
“Al wil ons graag tyd saam met ons vrouens en die kinders deurbring, is ons baie bly ons is nog hierdie week by rugby betrokke en ‘haal nog asem’ in die Super Reeks,” sê Terblanche, een van die uitblinkers in die sege van 26-23 oor die Bulls.
Hy sê die toetsatmosfeer wat op Loftus Versfeld geheers het, het bygedra om die beste uit die spelers te haal.
“Dit was ’n ongelooflike atmosfeer en ’n wonderlike plek om so ’n belangrike wedstryd te kon speel.
“Daar is diegene wat sê rugby is besig om sy glans te verloor, maar enigeen wat op Loftus was, sal die teendeel kan bewys.
“Dit was ’n wonderlike advertensie vir die spel en ’n voorreg om in só ’n wedstryd te kon speel.
“Albei spanne het ’n skouspel daarvan gemaak.
“Om te kon seëvier in ’n volgepakte Loftus is iets wat ek altyd sal onthou,” sê Terblanche, wat die eerste van die Sharks se twee drieë gedruk het.
“Niemand kon ons toewyding om dié wedstryd te wen in twyfel trek nie.
“Ons het geweet ons sal vuur met vuur moet beveg en selfs nog meer as dit moet doen,” sê Terblanche.
“Elke speler was uit die staanspoor bereid om sy lyf op die spel te plaas.
“Ons het nou vir ons ’n hoë maatstaf gestel en gewys dit kán gedoen word.
“Daar sal Saterdag teen die Crusaders meer daarvan nodig wees,” sê Terblanche.
Patrick Lambie, wat in die heelagter-posisie ’n vertoning gelewer het wat hom as speler van die wedstryd laat uitstaan het, was ook beïndruk met die spesiale atmosfeer wat daar geheers het – al het ’n Bulls-ondersteuner aanhoudend ’n laser in sy oog geskyn wanneer hy aangelê het pale toe.
“Ek gee dit nie die skuld vir die skoppe (drie) wat ek gemis het nie, maar ek moet sê ek was heeltyd bewus daarvan en het dit steurend gevind,” sê hy.
Sy vertoning as heelagter was van so ’n aard dat die Bok-afrigter, Peter de Villiers, nou diep daaroor kan dink om hom as draer van die nr. 15-trui te oorweeg.
Vir die jongste sportnuus volg Nuus24Sport op Twitter.
- Sport24