Sharks moet kopskuif maak ná olikheid
2011-05-04 09:34
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Op die hoogste vlak van rugby moet jy net een dag vyf persent af wees en jou teenstander vyf persent op – daai tien persent is ’n yslike klomp as dit by botsings kom.
Die gevolglike drag slae wat die Sharks oor die naweek teen die Stormers op die lyf geloop het, voorspel waarskynlik gevaar vir die sukkelende Brumbies.
“’n Klein veranderinkie in gemoed kan groot uitslae bring. Ons sal ons houding moet verander,” het die groot Sharks-flank Willem Alberts Dinsdag aan die media gesê. “Teen die Stormers het dit gelyk of ons net daar was om mee te ding, eerder as om net te speel om te wen.”
“Ons weet wat skeefgeloop het en ons sal ons houding dié week regkry, in mekaar glo en die kans vat om dinge reg te stel.
“Teen die Stormers het ons nie fisiek hard genoeg ingeklim nie en die lewe vir onsself in die proses bemoeilik. Ons het drie drieë uit eerste fase afgestaan, wat regtig is soos om presente uit te deel. Ons sal ons koppe moet agtermekaar kry – die Brumbies is ’n goeie span en het niks om te verloor nie.”
Saam met Alberts op die weeklikse mediakonferensie in die Haaitenk, het John Plumtree, die Sharks-afrigter, gesê hy vertrou sy span sal die terugslag kan verwerk en Saterdag die ding doen.
“Ons was nie lank gelede nie in dieselfde posisie. Ons het voorheen ook al verloor, goed selfondersoek gedoen en dinge omgekeer. Ons moet dié week maar net aanhou baklei, dis al wat ons kan doen. Die wyse waarop ons teen die Stormers verloor het, maak seer en ons moet op die regte manier reageer,” sê Plumtree.
Die Sharks het ’n loslootjie ná die wedstryd teen die Brumbies, maar speel daarna gasheer vir die Bulls in wat nou selfs ’n belangriker wedstryd geword het as wat dit reeds per definisie was.
“Dis dus deurslaggewend dat ons Saterdag goed speel,” sê Plumtree.
“Dis ’n hele ruk sedert ons die Brumbies geklop het en hulle is sekerlik ook gemotiveerd ná hul nederlaag teen die Cheetahs. Dit lyk al so half of hulle uit die reeks is, maar hulle sal beslis nie sonder ’n sege uit Suid-Afrika wil huis toe gaan nie.
“Dis ’n groot wedstryd vir albei spanne en die druk op die tuisspan ná ’n nederlaag is groot. Ons sal as ’n groep moet werk.”
Vir die jongste sportnuus volg Nuus24Sport op Twitter.
- Sport24