Sharks-bank spel gevaar
2011-04-29 07:54
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Met feitlik al hul krankes tegelyk weer gesond, sou ’n blinde man met ’n stok oor ’n draadloos kon voorspel dat die Sharks-rugbyspan Saterdag teen die Stormers op Nuweland met ’n gedugte plaasvervangersbank sou spog.
En dit is ook so – daar’s vyf Springbokke, plus die belowende Eugene van Staden en Conrad Hoffmann.
John Smit sal die Sharks lei, met Bismarck du Plessis wat ingevolge John Plumtree (afrigter) se gewone beleid eers via die bank van die krukkelys af terugkeer. Dieselfde geld die slot Alistair Hargreaves.
Du Plessis het vanjaar beter rugby gespeel, maar Smit was verlede naweek puik in die oorwinning oor die Hurricanes en het nog bitter selde ’n swak wedstryd teen die Stormers of die WP gespeel. En sy jonger mededinger om die Bok-trui in die laaste halfuur, uiters honger en gemotiveer, is nie ’n vooruitsig waarna veel teenstanders sou uitsien nie.
In ’n effens verrassende skuif ruil Odwa Ndungane en Lwazi Mvovo plekke, met die jonger man wat op die bank begin. Ndungane het verlede week as plaasvervanger opgedraf ná ’n besering, maar Mvovo het sy kans met albei hande gegryp.
Ndungane is ’n veel slimmer en meer skeppende speler, maar Mvovo se krag en vaart vergoed vir sy effense rouheid.
Plumtree wou nie groot praat by die aankondiging van sy span nie, maar is optimisties dat hulle verbeter het sedert die Stormers ’n maand gelede baas in ’n bitter taai kragmeting in Durban was.
“Dis so dat jy meer leer wanneer jy verloor as wanneer jy wen. Ons kon ná die wedstryd goed agteroor sit en kyk wat doen ons, wat doen ons verkeerd en hoe ons dit kan verander. Saterdag sal ons sien of ons ons strategie kan implementeer.”
Oor die waarskynlike afwesigheid van die Stormers-losskakel Peter Grant wou Plumtree hom nie eintlik uitlaat nie. Grant se stelskopvoet, gemak op die voordeellyn en verdediging was hoekstene van die span se vertonings tot dusver.
“Om eerlik te wees, ons bekommer ons net oor wat ons dié week doen, nie wat hulle doen of wie gaan speel nie. Hulle ken ons al teen die tyd, ons ken hulle en as hulle beserings het, is dit hul saak om op te los. Ons konsentreer eerder net op wat ons wil bereik.”
Wat die Sharks waarskynlik wil bereik, is ’n oorvloed stormlope in die rigting van waar Grant normaalweg sou staan. Met Willem Alberts, Beast Mtawarira en Smit, gevolg deur Du Plessis en Jean Deysel, kan dit ’n woelige middag op verdediging vir die tuis-lostrio wees.
Die Sharks-span is:
Louis Ludik, Odwa Ndungane, Stefan Terblanche, Meyer Bosman, JP Pietersen, Patrick Lambie, Charl McLeod, Ryan Kankowski, Willem Alberts, Keegan Daniel, Ross Skeate, Steven Sykes, Jannie du Plessis, John Smit (k), Beast Mtawarira.
PLAASVERVANGERS: Bismarck du Plessis, Eugene van Staden, Alistair Hargreaves, Jean Deysel, Conrad Hoffmann, Adrian Jacobs, Lwazi Mvovo.
Vir die jongste sportnuus volg Nuus24Sport op Twitter.
- Sport24