Schalk se peil laat sy breier blom
2010-03-23 12:24
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad
Die “Incredible Schalk” is terug!
Schalk Burger het eintlik nog nooit met enigiets anders as oorgawe gespeel nie, maar sy spelpeil is vanjaar só goed dat dit die Stormers se afrigter, Allister Coetzee, aan die vuurvreterflank se ongelooflike seisoen in 2004 laat terugdink.
Burger is daardie jaar as die Internasionale Rugbyraad (IRR) se speler van die jaar aangewys. Coetzee was toe een van die Springbokke se hulpafrigters.
“Julle het Schalk afgeskryf,” het Coetzee die media Saterdagaand ná die Stormers se sege van 21-8 oor die Cheetahs op Nuweland gekasty.
“Ons weet wat ons in Schalla het. Toe Heinrich Brüssow op die toneel kom, het baie mense gedink die skrif is aan die muur vir Schalla.
“Hy was in teenstanders en skeidsregters se visier, maar het deur dit als gekom en sy klas gewys. Ek is bly om te sien hoe goed hy speel. Dit herinner my aan 2004.”
Burger is vanjaar as die Stormers se kaptein aangewys nadat Jean de Villiers sy loopbaan by Munster gaan voortsit het.
Hy gedy in dié rol en inspireer met sy spel. Benewens die feit dat hy steeds soos van ouds inklim, soek hy meer ruimte op die aanval op.
Coetzee is in sy noppies met Burger se leierskap en meen hy toon die potensiaal om sy land aan te voer.
“Hy het die vermoë om dit te doen. Hy is rustig, maar daar is ’n groot intensiteit,” het Coetzee gesê in antwoord op ’n vraag of hy ’n Bok-kaptein op hande het.
“Schalk som die spel vinnig en raak op. Hy het ’n goeie aanvoeling. Dit kom neer op intelligensie.”
Burger het nog nie vanjaar ’n geelkaart gekry nie, hoewel die ligte klap wat hy Meyer Bosman Saterdag gegee het hom byna in die pekel laat beland het.
“Schalk leef voluit en is ’n passievolle ou. Ek het geen probleem met hoe hy oefen en speel nie,” sê Coetzee.
“Soms is hy ongelukkig dat sulke dinge raak gesien word, maar dis al. Jy moet iets ernstigs aan Schalk doen voor hy reageer.
“Hy is die eerste ou wat vir die ander spelers gesê het hulle gaan probeer om onder ons vel in te kruip en dat ons die ander wang sal moet draai.
“Schalk bring kalmte en rustigheid.”
- Sport24