Schalk nóg ’n maand op krukkelys
2013-02-19 07:00
In-diepte Verslae
Die Bok-stut Tendai "Beast" Mtwarira is terug vir die Sharks se Super-stryd teen die Bulls, nadat hy lank op die kantlyn was weens 'n besering.
Die Cheetahs se afrigter, Naka Drotské, het die versoeking weerstaan om Heinrich Brüssow in die 15-tal te kies vir die stryd teen die Higlanders.
Kaapstad – Dis ’n jaar sedert hy laas op die veld gedraf het, maar Schalk Burger sal nóg ’n maand langs die kantlyn moet deurbring, het Die Burger berig.
Sy kuitbesering het nie genoeg herstel dat hy die Stormers Vrydagaand in hul eerste Superrugby-wedstryd van die seisoen, teen die Bulle op Loftus Versfeld, sal kan aanvoer nie.
Burger sal eers weer ná die Stormers se eerste loslootjie, in hul wedstryd in die vierde ronde, in aanmerking kom.
“Sy knie is eenhonderd persent, maar die dêm kuit gee hom nou las. Ek gaan nie ’n kans waag met Schalk- of Juan (de Jongh)-hulle nie,” het die Stormers se afrigter, Allister Coetzee, Maandag gesê.
“Dit help nie hulle speel ’n wedstryd en vererger dan die besering nie. Jy wil sulke spelers vir lang rukke reg hê.”
Ondanks ’n lang krukkelys, wat ook Eben Etzebeth en Tiaan Liebenberg insluit, sê Coetzee dit is een van die sterkste spanne wat hy al vir die Stormers kon kies.
Die drie Bokke wat hulle uit Johannesburg kon leen – Jaco Taute, Elton Jantjies en Pat Cilliers – is almal in die vyftiental wat in Pretoria sal uitdraf en gee die Kaapse streekspan ’n yslike skoot ekstra oemf.
– Volg Nuus24Sport op Twitter
