Schalk nie teen Luke ingespan
2012-02-07 09:57
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad. – Daar sal geen konfrontasie tussen Schalk Burger en Luke Watson wees in Saterdag se opwarmwedstryd tussen die Stormers en Southern Kings in Port Elizabeth nie.
Burger, die Stormers-kaptein, het gisteraand die Laureus-toekenningsaand in Londen bygewoon. Hy kan dus nie voor Woensdag oefen nie, en sal dus nie deur sy rugbybreier, Allister Coetzee, vir sy beginspan oorweeg word nie.
Dis welbekend dat Burger en Watson nie om dieselfde vuur gesit het terwyl laasgenoemde by die Westelike Provinsie was nie.
Coetzee meen dié vurige losvoorspeler het reeds genoeg in die voorseisoen gedoen om skerp te wees teen die tyd wat die Stormers die Hurricanes, op 25 Februarie, pak.
“My plan was altyd om seker te maak dat spelers 160 – of ’n minimum van 120 minute – in opwarmwedstryde speel voor die Super-reeks begin. Schalk sal hom Woensdag weer by ons aansluit, maar het genoeg minute op die veld deurgebring.”
Coetzee sal nou vir Duane Vermeulen die eerste keer vanjaar inspan nadat hy van sy kniebesering herstel het.
Coetzee gaan hom nie in Burger se afwesigheid daarmee bemoei om ’n spesialis-baljagter op die proef te stel nie. “Ons wil seker maak dat al ons spelers 120 minute kry. Ek is tevrede met Schalk, maar ons moet nou vir Duane betrek.
“Ek wil hê elke speler naby die bal moet goeie besluite neem. Ek wil ons nie tot ’n sekere tipe speler beperk nie. Ons wen vernaam met ons aggressiewe verdediging omkeerbesit.”
Hy was tevrede met sy spelers se dissipline by die afbreekpunte teen die Cheetahs.
“Ons het slegs ses strafskoppe op die verdediging afgestaan teenoor die vorige week se twaalf.”
Vir die jongste sportnuus volg Nuus24Sport op Twitter.
– Sport24