Schalk gedy in leiersrol
2010-05-19 09:58
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad - Daar was ’n tyd toe hy as ’n lopende dissipline-risiko beskou is, maar Schalk Burger lyk goed op koers om die Springbok-rugbyspan in die era ná John Smit aan te voer.
Burger (27) se eerste seisoen as kaptein van die Stormers is ’n klinkende sukses, met die Kaapse streekspan wat Saterdag in hul eerste tuis-halfeindstryd sedert 1999 op Nuweland teen die Waratahs speel.
Burger het vanjaar met sy spelpeil uitgeblink en onder hom is die Stormers se dissipline ook indrukwekkend, met Bryan Habana se geel kaart Saterdag teen die Bulls – vir ’n professionele oortreding – hul enigste tot dusver in die Super14-reeks.
Burger se ervaring van 55 toetse en welslae as kaptein by die Stormers maak van hom ’n logiese keuse as Bok-kaptein wanneer John Smit en Victor Matfield ná volgende jaar se Wêreldbeker-toernooi waarskynlik hul toetsloopbane gaan beëindig.
Dit kan selfs wees dat dit met Allister Coetzee in die tuig as Bok-breier sal wees, hoewel Peter de Villiers ook natuurlik kan besluit om weer vir die pos aansoek te doen.
Coetzee en Burger is in hul eerste seisoen as hoofafrigter en kaptein ’n sukses-storie.
Corné Krige, voormalige kaptein van die Stormers en Bokke, glo Burger se grootste deug as kaptein is dat hy deur sy voorbeeld lei.
“As jy deur jou voorbeeld as speler lei, hoef jy nie veel te sê nie. Schalk speel in elke wedstryd sy hart uit,” het Krige gesê.
Met die Stormers wat Saterdag teen die Waratahs speel, sal Burger natuurlik oudergewoonte teen die Aussie-span se kaptein en baljagter, Phil Waugh, opgeweeg word.
Die realiteit is egter dat daar nie streng gesproke in die Stormers se lostrio van Burger, Francois Louw en Duane Vermeulen iemand is wat hom uitsluitlik as ’n baljagter toespits nie.
Louw is seker die naaste daaraan, maar al drie se waarde lê in hul veelsydigheid. Ofskoon Burger ’n stewige werkverrigting by die losskrums het, is hy veral efektief as baldraer. Hy het luidens Verusco se statistieke byvoorbeeld met die 220 keer wat hy die bal hanteer het, 445 meter veld gewen ná kontak met die eerste verdediger.
Waugh wen meer dikwels as Burger omkeerbesit, maar het slegs 256 m veld gewen ná kontak met die eerste verdediger in die 196 keer wat hy die bal hanteer het.
Voorts is Burger, soos sy losvoorspeler-kollegas by die Stormers, ’n lynstaanopsie en Waugh nie.
Die feit dat al drie van die Stormers se losvoorspelers veelsydig is, is waarskynlik ’n faktor wat hulle só gedug maak.
“Schalk se werkverrigting is wat hom so waardevol maak, maar hy is te groot en lank om effektief in die tradisionele rol van oopkantflank te wees,” sê Krige.
“Gegewe sy lengte kompeteer hy besonder goed. Ek sou my indink dat Francois Louw eintlik meer omkeerbesit as Phil Waugh wen.
“Schalk en Duane is weer beter baldraers as Flo.
“Die feit dat al drie groot is, help ook die vaste vyf.
“Flo speel veral baie na die bal toe.
“Schalk se werkverrigting is baie hoog en ons sien deeadae dat hy ook die rol van balverspreider speel.
“Hy het goeie hande en vaardighede.
“Duane vervul die tradisionele rol van agtsteman uitstekend. Hulle vul mekaar besonder goed aan.”
Dis inderdaad ’n lostrio wat nog nie vanjaar ore aangesit is nie, en dit sal geen verrassing wees indien Louw en Vermeulen ook binnekort op nasionale vlak erkenning kry nie.
Verusco verskaf statistieke aan al die Super14-spanne behalwe die Stormers, maar ontleed ook die Kaapse span se wedstryde.
Bly op hoogte van al die jongste sportnuus deur Nuus24Sport op Twitter te volg.
- Sport24