Sarel proe soet én suur by 'Tahs
2012-02-27 09:25
In-diepte Verslae
Die skrumskakel Piet van Zyl het twee keer vir die Cheetahs oorgeduik in hulle oorwinning oor die Reds in Bloemfontein.
Die Cheetahs se afrigter, Naka Drotské, het die versoeking weerstaan om Heinrich Brüssow in die 15-tal te kies vir die stryd teen die Higlanders.
Sydney. – Sy buiging vir die Waratahs in die Super-rugbyreeks was bittersoet vir die Suid-Afrikaanse skrumskakel Sarel Pretorius.
Dié buksie het met 13 minute oor vir die tuisspan gaan druk in die kragmeting met die Reds en dit het na die wendrie vir die Waratahs gelyk.
Maar Pretorius en sy nuwe spanmaats se vreugde was van korte duur toe die vleuel Dom Shipperley in die doodsnikke ’n weghol-drie gaan druk het om die Reds se seisoen met ’n oorwinning af te skop.
Shipperley het meer as 60 m genael om aan die besoekers ’n sege van 25-21 te besorg.
Die Reds se losskakel, Mike Harris, se skopvoet was uiteindelik die verskil.
Hy het ses strafdoele behaal en ofskoon hy nie dieselfde flair aan die dag gelê het nie, het hy bewys dat hy gemaklik as die beseerde Quade Cooper se adjudant ingespan kan word.
Wycliff Palu het vir die tuisspan gaan druk voordat Pretorius afgerond het, maar toe laasgenoemde deur Brendan McKibbin vervang is, het die wiele afgeval.
McKibbin het die bal doelloos weggeskop en die Reds het ’n laaste aanval geloods wat op Shipperley se wendrie uitgeloop het.
Puntemakers:
Reds 25 (12): Drie: Dom Shipperley. Doelskop: Mike Harris. Strafdoele: Harris (6).
Waratahs 21 (8): Drieë: Wycliff Palu, Sarel Pretorius. Doelskop: Daniel Halangahu. Strafdoele: Halangahu (3).
Die Chiefs het behoorlik onder die beseringspook deurgeloop in hul nederlaag van 19-23 teen die Highlanders in Hamilton.
Die Chiefs-stut Ben Afeaki het sy arm gebreek en sal 12 weke langs die kantlyn wees.
Hul loskopstut, Toby Smith, het ’n kuitspier verrek het en sal self ses weke buite aksie wees.
Brendan Leonard, die Chiefs- skrumskakel, het sy dyspier geskeur en sal tot 10 weke ruskans nodig hê, terwyl die vleuel Lelia Masaga (knie) en agtsteman, Alex Bradley (enkel), straks ook drie weke op die krukkelys sal wees.
Die Highlanders was met 9-19 agter nadat Leila Masanga vir die Chiefs gaan druk het, maar Aaron Smith en Phil Burleigh het toe ’n drie gedruk vir die sege.
Puntemakers:
Highlanders 23 (9): Drieë: Aaron Smith, Phil Burleigh. Doelskoppe: Chris Noakes (2). Strafdoele: Noakes (3).
Chiefs 19 (16): Drie: Leila Masanga. Doelskop: Aaron Cruden. Strafdoele: Cruden (4).
Die Rebels-kaptein, Stirling Mortlock, het tot Woensdag kans om te bewys dat hy volkome van ’n beseerde kuitspier herstel het om vir die Waratahs-stryd in aanmerking te kom.
Die Rebels se loslootjie het Mortlock bykomende herstelkans gegee, maar hul afrigter, Damien Hill, het toegegee dat dit nie ’n uitgemaakte saak is dat die senter sal speel nie.
Vir die jongste sportnuus volg Nuus24Sport op Twitter.
– Sport24
