SA moet wag ná naweek van riller-rugby
2011-06-12 08:03
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Suid-Afrika sal tot volgende naweek moet wag om te sien of hulle een, twee of drie spanne in die uitspeelfase van die SuperRugby-reeks gaan hê.
Ná ’n naweek van riller-rugby waarin die drie plaaslike aanspraakmakers gehik, gestamp en gestoot het in hul onderskeie veldtogte, moet die land nóg ’n naweek wag om te sien of die Stormers, Bulls én Sharks dit ’n glorieryke een vir hul land gaan maak in die eerste jaar van die vergrote Super-reeks.
Al drie spanne het Saterdag ’n kans om deel te bly van die vergrote reeks met sy eienaardige uitspeelformule waarin elkeen van Suid-Afrika, Nieu-Seeland en Australië uitspeelwedstryde gewaarborg is, maar nie noodwendig volgens die finale puntelys nie.
Terwyl die Bulls en Stormers mekaar op Nuweland in die grond ingespeel het (met die Bulls met 19-16 baas), kon die Sharks nie dié stryd tussen die Noord-Suid-vyande tot sy voordeel benut nie en moes diep, diep delf om ’n begeesterde Lions-span in toom te hou.
Die gelykop-uitslag (30-30) op Coca-Cola Park was nié wat die besoekers nodig gehad het nie en hulle het die onbenydenswaardige taak om komende naweek die Bulls op Loftus Versfeld te klop om seker te maak hulle speel nog saam in die reeks.
Die feit dat drie plaaslike spanne in die uitspeelfase is, is goeie nuus vir die Springbokke en hul hoop in die Wêreldbekertoernooi, glo die Bulls-kaptein, Victor Matfield.
“In 2007 het die Sharks en die Bulls in die eindstryd van die Super14-reeks gespeel en dit het ons definitief ’n hupstoot gegee met die oog op die Wêreldbeker. Ons het bymekaar gekom met baie selfvertroue en die wete dat ons die spelpatroon het wat ons suksesvol kon maak. Om drie spanne in die laaste ses te hê vanjaar, kan dieselfde effek hê.”
Waar die stryd op Coca-Cola Park veel meer in spanverband gespeel is, was die stryd op Nuweland baie meer persoonlik.
Verskeie spelers in albei spanne het baie gehad om voor te speel nadat die Bok-afrigter, Peter de Villiers, besluit het om sy groep van 51 tot 37 te verklein, met verskeie Bok-aanspraakmakers soos Zane Kirchner, Bjorn Basson, Deon Stegmann, Dewald Potgieter, Francois Louw, Ricky Januarie en Peter Grant wat weggelaat is uit die groter Bok-prentjie.
Dit was genoeg motivering vir verskeie van dié spelers om blikaspaai te speel en uiteindelik het hulle. Dit laat die Bok-afrigter met ’n klomp regmerkies wat hy moet maak.
Uiteindelik lag SA Rugby waarskynlik die lekkerste, want terwyl die Cheetahs en Stormers in Bloemfontein en die Bulls en Sharks in Pretoria mekaar in die grond in gaan speel Saterdag, rol die rande in.
Een aspek oor SuperRugby is baie duidelik. Die Reds, Blues en Crusaders is goeie spanne, maar Bok-rugby kan breëbors loop oor sy trio.
- Volg Nuus24Sport op Twitter.
- Rapport