Ruskans vir die Stormers; steil pad vir Sharks
2011-06-19 07:05
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein – In Pretoria is dit die einde van ’n glorieryke era en in die Kaap is dit weer Hollands!
Nadat die Bulls se manmoedige poging om hul Superrugby-titel te verdedig Saterdagmiddag met ’n nederlaag van 23-26 teen die Sharks op Loftus Versfeld gesneuwel het, het die Stormers Saterdagaand seker gemaak van ’n tuishalfeindstryd deur die Cheetahs in die Vrystaat-stadion met 44-34 te klop.
Die Sharks is danksy hul sege ook deur na die uitspeelwedstryde, maar ’n opdraande stryd wag vorentoe op hulle.
Die Durbaniete moet vandeesweek na Nieu-Seeland reis om teen die wenners van die Kiwi’s se Super-groep, die Crusaders, te speel.
Die Blues en Waratahs sal sake in die ander kwarteindstryd in Auckland uitspook.
Dít terwyl die Stormers luilekker agteroor gaan lê op hul rusbanke voordat hulle volgende naweek in hul agterplaas die eindstryd gaan probeer haal.
Die Stormers het Saterdagaand vir die eerste keer in ’n dekade ’n trofee verower toe hulle bo-aan die Suid-Afrikaanse konferensie geëindig het.
Dít is die eerste noemenwaardige trofee wat ’n Kaapse kaptein kon lig sedert Corné Krige in 2001 die gesogte Curriebeker omhoog gehou het.
Die Stormers-kaptein, Schalk Burger, sal straks nou sy oog op ’n veel groter prys hê – die Kapenaars is net twee seges weg daarvan om as die kampioenspan van die Suidelike Halfrond gekroon te word.
Suid-Afrika se hoop om drie spanne in die uitspeelwedstryde van die Super-reeks te hê, het vroeër Saterdag gesneuwel toe die Waratahs in Sydney maklik met 41-7 met die Brumbies afgereken het.
Dit het meegebring dat die kragmeting op Loftus tussen die Bulls en Sharks effektief op ’n uitklopwedstryd neergekom het.
Die Bulls was die gunsteling om as oorwinnaars van die veld te stap nadat hul ses agtereenvolgende oorwinnings behaal het, maar die Sharks het van meet af ingeklim.
Tog kan die Bulls vandag hul koppe omhoog hou ná hul puik terugvegpoging in die kompetisie ná ’n nagmerrie-begin in die reeks.
Om ses wedstryde op ’n streep te wen, sit in min spanne se broek.
– Sport24
Bly op hoogte van al die jongste sportnuus deur Nuus24Sport op Twitter te volg