Ruan terug op skrumskakel
2010-03-05 09:38
In-diepte Verslae
Allister Coetzee, wat uit verskeie oorde gekritiseer is oor Jebb Sinclair se insluiting, het sy soektog na 'n oorsese losvoorspeler laat vaar.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Christo Buchner
Johannesburg
Die Sharks het hul vernaamste bron van punte die trekpas gegee.
Die KwaZulu-Natallers kom Saterdag in hul Super14-rugbywedstryd in Sydney teen die Waratahs te staan.
Rory Kockott het 39 van die Sharks se 44 karige punte in hul eerste drie wedstryde aangeteken, maar bevind hom op die plaasvervangerbank, met Ruan Pienaar wat die eerste keer dié seisoen in sy gunsteling-posisie in die nr. 9-trui begin.
’n Nuwe skakelpaar is deel van die sewe veranderings wat gemaak is aan die span, wat teen die Crusaders vasgeval het.
Vir die vierde week in ’n ry word weer getorring aan die voorry, met John Smit wat van vaskopstut na haker skuif, met Jannie du Plessis wat die nr. 3-trui dra.
Die beweeglike Deon Carstens begin die eerste keer dié seisoen ’n Super14-wedstryd, met Beast Mtawarira wat vir hom aan die loskopkant plek maak.
Pienaar se nuwe skakelmaat is Andy Goode (Engelse losskakel), met Riaan Swanepoel wat as senter langs Adrian Jacobs in die plek van Waylon Murray inskuif.
Keegan Daniel is terug langs die kant van die skrum in die plek van Jacques Botes. Pienaar was maar baie plan- en lusteloos in die wedstryde waarin hy losskakel gespeel het.
Daar sal van hom verwag word om meer vonk as skrumskakel te verskaf. Die stelskopwerk sal ook waarskynlik aan Pienaar toevertrou word.
In daardie opsig het dié Springbok-speler groot skoene om vol te staan, aangesien Kockott se korrel dodelik akkuraat ingestel was.
Dit is egter drieë wat die Sharks wil hê en Pienaar en Goode sal rigting moet gee aan ’n agterlyn wat skynbaar nie die slaankrag het om uit ’n dun papiersak los te wikkel nie.
Die Sharks-span is:
Stefan Terblanche, Odwa Ndungane, Adrian Jacobs, Riaan Swanepoel, JP Pietersen, Andy Goode, Ruan Pienaar, Ryan Kankowski, Willem Alberts, Keegan Daniel, Johann Muller, Steven Sykes, Jannie du Plessis, John Smit (kaptein), Deon Carstens.
Plaasvervangers: Bismarck du Plessis, Beast Mtawarira, Wilhelm Steenkamp, Jean Deysel, Jacques Botes, Rory Kockott, Waylon Murray
- Die Burger