Robert-hulle reg vir Meyer
2011-06-03 09:14
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Hy is lank hier hoog aangeskryf as planmaker en het in die eerste ontmoeting met sy voormalige span tande gewys, maar Meyer Bosman se verdediging sal Saterdag behoorlik deur sy ou spanmaats getoets word.
Dié Sharks-senter keer die eerste keer sedert sy vertrek na Durban na die Vrystaat-stadion terug en sal alles behalwe ’n helde-ontvangs van Corné Uys en Robert Ebersohn ontvang.
Uys en Ebersohn het dikwels die middelveld saam met Bosman, wat nog nie sy beste peil in ’n Sharks-trui bereik het nie, vir die sentrale streekspan beman.
Dit is veral Bosman se verdediging wat vanjaar ’n leemte in die besoekers se mondering was en waaruit die Cheetahs-senterpaar wil munt slaan.
Hoewel die Sharks in 2011 se eerste kragmeting in die Haaitenk met 24-9 baas was, kom Bosman-hulle dié keer teen ’n ander Cheetahs-span, een wat met sy aanvallende spel beïndruk, te staan.
Ebersohn-hulle het hoeka verlede naweek die Bulls se Springbok-senterpaar, Wynand Olivier en Jaco Pretorius, ore aangesit.
Soveel so dat Ebersohn, ondanks die Cheetahs se nederlaag van 21-32 op Loftus Versfeld, as speler van die wedstryd aangewys is. Dié Blitsbok se werkverrigting is baie hoog. En as buitesenter besorg hy sy teenstanders hoofbrekens met sy goeie voetwerk, iets waaraan hy vanjaar hard werk.
Die leemte in Bosman se verdediging vanjaar is onder andere deur die Crusaders se Sonny Bill Williams en die Stormers se Jean de Villiers ontbloot en Ebersohn-hulle wil sekerlik dieselfde doen.
Volgens Hawies Fourie, agterlyn-afrigter van die Cheetahs, het die tuisspan ’n hoë agting vir Bosman, maar meen hy ook dié Bok is nie heeltemal op dreef nie.
“Meyer se balverspreiding is beslis sy sterkpunt. Hy is waarskynlik die binnesenter met die beste aangee in die land. Hy het aan die begin van die Super Reeks goed gespeel, maar nog nie so goed by die Sharks aangepas soos wat ek verwag het nie. Hy sukkel die laaste tyd ’n bietjie met sy peil,” sê hy.
Fourie meen Bosman en die Sharks-losskakel, Patrick Lambie, is die spil waarom die besoekers se aanvalle draai en daarom moet die Cheetahs hulle ontwrig.
Hoewel Bosman se balverspreiding sy sterkpunt is, het teenstanders dit dikwels reggekry om van sy aangeë te “lees” en te onderskep.
Tog sê Fourie die Cheetahs sal nie daarop uit wees om noodwendig teen Bosman te probeer onderskep nie.
“Ek dink nie ’n ou moet te veel klem lê daarop nie. Ons verdedigingstelsel werk nie so dat jy vir onderskep-drieë kan gaan nie. Bryan Habana het Meyer destyds goed gelees toe hy vir ons gespeel het, maar ’n ou maak jouself ook kwesbaar op die verdediging as jy vir ’n onderskepping opskiet.”
Vir die jongste sportnuus volg Nuus24Sport op Twitter.
- Sport24