Reus teen reus in eindstryd
2010-05-29 15:06
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
J.J. Harmse
Pretoria - Die een word al lank geëer as die beste slot ter wêreld. Die ander is die kroonprins.
Vandag in die Orlando-stadion ontmoet Springbok-rugby se twee ster-slotte as teenstanders in wat beskou word as die super-tweestryd van die Super14-eindstryd.
Die stryd tussen Victor Matfield en Andries Bekker sal nie net bepalend wees in hul spanne se strewe om 2010 se Super14-kampioene te word nie, maar kan ook die tergende vraag beantwoord of die Stormers se hemelbesem gereed is om op nasionale vlak by sy leermeester oor te neem.
Vir Matfield, die Springbokke en die Bulls se mees ervare slot tot nog toe, is dit nog nie sulke tyd nie, hoewel hy baie lof het vir die Stormers-reus. Trouens, hy beskou Bekker as die beste nr. 5-slot wat rugby speel. “Andries is sekerlik die beste nommer vyf ter wêreld. Daar is niemand wat naby hom kom nie. Hy is ’n uitstaande speler,” meen Matfield.
Hy gaan egter nie toelaat dat hy getroef word nie, maar erken sy taak word bemoeilik omdat hy en Bekker as Springbokke gereeld saamwerk en ontledings doen.
“Ons het in die laaste paar seisoene gereeld daar saamgewerk. Dit maak dus my taak moeiliker, maar die uitdaging ook groter. Boonop is ons goeie vriende; dus gaan dit beslis ’n interessante stryd wees.” het Matfield gesê.
Statistieke vertel dat die Bulls-kaptein die oorhand in die lynstane kan hê.
Die Bulls het vanjaar verskeie kere die bal met ál hul ingooie gewen. Trouens, die Bulls het met slegs 15 ingooie (8,4%) nié die bal gewen uit die 164 keer wat hulle dit ingegooi het nie.
Die Stormers is ewe gedug, met slegs 19 van hul 163 (10,4%) ingooie wat nie die kol getref het nie.
Waar die Stormers egter gemiddeld 6,7 keer in ’n wedstryd op Bekker gooi (hy het 81 uit 94 gooie op hom gewen), het die Bulls meer lynstaankeuses en word daar maar gemiddeld 4,9 keer in ’n wedstryd op Matfield gegooi. Matfield het 89% van sy eie balle gewen en Bekker 83%.
As dit kom by lynstaanballe steel, is die Bulls en die Stormers baie gelyk, met die Stormers (19,2%) ’n aks voor die Bulls (19%).
Bekker het 9 uit 37 balle by teenstanders afgeneem (24%) en Matfield 9 uit 31 (29%).
Die statistieke dui dus daarop dat Matfield steeds ’n beter lynstaanspringer as Bekker is, maar albei se werklike waarde is veel hoër as dit en kan nie altyd met statistieke gemeet word nie.
Daar is Matfield se leierskap wat vanjaar nuwe hoogtes bereik het. Sy keuses by strafskoppe, sy kalmte onder druk en sy vermoë om iets spesiaals te doen, maak dat hy die speler is na wie spanmaats eerste kyk.
Bekker het self as leier ontpop, maar dit was vanjaar sy vermoë met die bal in die hand, die intensiteit van sy duikslae en werk in die vastelos wat hom van die volgende speler onderskei het. Hy dink beslis ook meer oor die spel as voorheen.
Vandag se stryd sal dus wys of die jong bul gereed is om die ouer een uit die trop te stoot.
- Sport24
Bly op hoogte van al die jongste sportnuus deur Nuus24Sport op Twitter te volg.