Plumtree lig dalk sluier oor Div-planne
2011-05-09 07:02
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Durban - Jean Deysel het in die naweek sy naam in die reeds vollerige losvoorspelerhoed gegooi vir dié spelers wat later vanjaar Wêreldbeker-toernooi toe wil gaan.
Dié Sharks-flank het eergister in sy eerste volle wedstryd in Super Rugby uitgedraf nadat ’n kniebesering hom bykans die hele 2010-seisoen langs die kantlyn laat staan het.
En hy het beïndruk met sy werkverrigting, dryfspel en lakwerk.
Kortom, die besering het beslis nie Deysel se vermoëns nadelig beïnvloed nie en hy sal beslis in tel wees as die Drienasies-reeks aanbreek.
“Jean was uitstekend.
“Hy het alles gedoen wat ek van hom verwag het,” was agterna John Plumtree, die Sharks-afrigter, se mening.
Plumtree het dalk onwetend die sluier gelig oor hoe die Bok-afrigter, Peter de Villiers, vanjaar se Drienasies-reeks gaan benader.
SA Rugby en SAB maak oormôre ’n “groot aankondiging” – waarskynlik ’n borgskap vir dié spogreeks tussen die Springbokke, die Wallabies en die All Blacks.
Plumtree meen egter vanjaar se reeks gaan nie dieselfde intensiteit as in vorige jare hê nie en glo De Villiers gaan die net wyd span in dié vier toetse.
“Ek kan eerlikwaar nie sien dat enigiemand oor die Drienasies gaan praat as die Superreeks verby is nie. Dan gaan dit net Wêreldbeker-praatjies en beplanning wees.
“Die Drienasies kan ’n waardevolle toernooi wees om nog spelers wat nie so baie gespeel het nie, ’n lopie te gee,” het hy gesê.
“Die span wat tuis sal speel (in Durban teen Australië en Port Elizabeth teen Nieu-Seeland) sal seker sy (De Villiers) se voorkeurspan wees, maar ek dink vir die twee wegwedstryde in die reeks, gaan Peter kyk na speelminute in die Superreeks.”
Dit maak volgens Plumtree sin om gereelde toetsspelers tydens die oorsese deel van die reeks ’n blaaskans te gee, iets wat De Villiers se voorganger, Jake White, ook met groot vrug in 2007 gedoen het.
Dit kan aan spelers soos Deysel, Adrian Jacobs, Flip van der Merwe en Juan de Jongh ’n kans gee om hulle in die Wêreldbeker-groep te vestig.
Deysel se flankmaat, Keegan Daniel, moet vandag voor ’n tugkomitee verskyn nadat hy uitgewys is vir ’n beweerde gevaarlike, laat duikslag op die Brumbies-senter Christian Lealiifano.
– Sport24
Bly op hoogte van al die jongste sportnuus deur Nuus24Sport op Twitter te volg