Plumtree draai geen doekies om
2011-04-04 08:15
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Durban - John Plumtree, die Sharks se afrigter, het sy span van naïwiteit onder druk beskuldig ná hul nederlaag van 6-16 Saterdagaand hier op Kingspark teen die Stormers.
“Ons het in die eerste helfte in hul hande gespeel en moes meer vir gebiedsvoordeel geskop het,” het Plumtree ná dié Super Rugby-wedstryd gesê.
Oor die Sharks se swak hanteerwerk en hul gesukkel in die lynstane, het Plumtree gesê dis ook ’n bron van kommer.
Ná ’n goeie begin in die reeks, waar die Sharks hul eerste vier wedstryde gewen het, het hulle nou drie keer agtereenvolgens verloor en raak hulle al hoe verder agter die voorlopers.
Nóg ’n nederlaag Saterdag hier teen die Lions kan gewis nie bekostig word nie.
Dis ’n gevaarstryd vir die Sharks, want hulle het nie ’n onlangse goeie vertoningslys teen die Lions nie.
Hulle het juis verlede jaar aan die einde van die seisoen teen die Leeus in die Curriebeker-reeks verloor.
Die Sharks se gebrek aan kontinuïteit, asook hul deurdringingsvermoë, is veral kommerwekkend.
“Die 50/50-kanse het ook nie na ons kant toe gegaan nie,” het Plumtree gesê.
“Boonop was daar ’n paar skeidsregter-beslissings wat grensgevalle was en waar ons aan die kortste ent getrek het,” het hy gesê.
“Ons het ’n stewige poging ingesit en werklik hard probeer, maar dinge wou nie uitwerk nie. Die Stormers was deurentyd in beheer.”
Volgens hom maak die Bok-slot Andries Bekker ’n groot verskil vir die Stormers in die lynstane en is Peter Grant, wat ’n ruk lank in Japan gespeel het, ’n aansienlike verbetering op losskakel.
“Hulle is ’n span wat in homself glo en dit maak ’n groot verskil,” sê hy.
Die Sharks het in hul laaste paar wedstryde grootliks as individue gespeel en het nie genoeg fases afgedwing om bewegings suksesvol af te rond nie.
By ’n paar geleenthede het spelers die voordeellyn oorgesteek, maar dan het ondersteuning ontbreek.
Plumtree glo ook nie die kwaai reisprogram van hul toer na Australië en Nieu-Seeland en verlede Sondag se kragmeting met die Crusaders in Londen, het ’n rol gespeel in hul nederlaag.
“Tot aan die einde het ons nog goed bygehou, maar ons kon nie op die telbord, waar dit saak gemaak het, ons stempel afdruk nie,” het Plumtree gesê.
Vir die jongste sportnuus volg Nuus24Sport op Twitter.
- Sport24