Oud-Stormer ’n Cheetah
2011-05-30 07:53
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Die Cheetahs het ’n flank-noodsein aan die voormalige Stormer Pieter Myburgh uitgestuur nadat hulle Saterdag hier teen die Bulls hul sesde losvoorspeler van 2011 se Super Rugby-reeks weens beserings verloor het.
Myburgh, wat vanjaar vir die Engelse klub Leicester Tigers uitgedraf het, sluit hom Maandag vir die res van die reeks by die sentrale streekspan aan en sal ook in die Curriebeker-reeks vir die Vrystaat speel.
Dit volg nadat Kabamba Floors sy kruisligamente in die Cheetahs se nederlaag van 32-21 teen die Bulls op Loftus Versfeld seergemaak het.
Die Cheetahs moes reeds sonder die losvoorspelers Juan Smith (haksening), Heinrich Brüssow (dyspier), Philip van der Walt (knieligamente), Frans Viljoen (arm) en Leon Karemaker (skouer) klaarkom.
Boonop is die Griekwas-kaptein Wesley Wilkins (skouer), wat moontlik nader getrek kon word, ook op die krukkelys.
Naka Drotské, die Cheetahs se afrigter, het juis verlede week genoem dat sy span nie meer beserings op losvoorspeler of slot kan bekostig nie, aangesien daar nie meer plaasvervangers beskikbaar is nie.
Hoewel Floors volgens Drotské eers Maandag ’n finale skandering sal ondergaan, verwag hy die ergste.
“Kabamba sal môre (vandag) vir ’n skandering gaan, maar ek maak my daarvoor reg dat hy vir die res van die jaar uit gaan wees.
“Dit wat ons ná die wedstryd gesien het, het nie goed gelyk nie en kruisligamente is altyd ’n lang storie,” sê Drotské.
Floors kan maande langs die kantlyn wees en daarom is daar inderhaas ’n plan gemaak om Myburgh, ’n Namibiër van geboorte, nader te trek.
“Pieter Myburgh sal Maandag (vandag) al in Bloem wees. Hy sal vir die res van die Superreeks vir die Cheetahs speel en tot aan die einde van die Curriebeker-reeks vir die Vrystaat beskikbaar wees,” sê Drotské.
Floors is vroeg van die veld af en dit het Johan Wessels, wat ’n week tevore teen die Melbourne Rebels sy buiging in Super Rugby gemaak het, aan die diep kant ingegooi.
Hoewel die Bulls in die eerste helfte op die grond baas was, het Wessels-hulle in die tweede helfte aansienlik beter in dié afdeling gevaar.
Die jong baljagter het homself teen die verdedigende kampioen laat geld en sy teenstanders hoofbrekens op die grond besorg.
“Johan het in die tweede helfte iets soos twee balle omgekeer, wat goed was. Ons sal Maandag (vandag) na die video kyk om presies te sien hoe hy gevaar het. Hy sal waarskynlik die volgende wedstryd (Saterdag in die Vrystaat-stadion teen die Sharks) begin.
“Daar is ses losvoorspelers uit en ons het nie meer opsies nie,” sê Drotské.
Wessels kan saam met die hardwerkende Ashley Johnson en onderskatte Davon Raubenheimer die lostrio teen die Sharks vorm.
Johnson was eenvoudig uitmuntend en het een van die mooiste drieë van die wedstryd gedruk. Raubenheimer doen stil-stil wat van hom verwag word.
Vir die jongste sportnuus volg Nuus24Sport op Twitter.
- Sport24