Oud-Bok gee Ashley regmerk
2011-06-02 10:02
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Dit sal byna ’n sonde wees as die Springbok-rugbykeurders nie raaksien watter invloed Ashley Johnson op die Cheetahs se verbeterde spelpeil in vanjaar se Super Rugby-reeks het nie.
Dié bossiekop-losvoorspeler van die Cheetahs speel Saterdag hier in die Vrystaat-stadion teen die Sharks en in die sentrale streekspan se laaste ligaverpligting teen die Stormers, vir ’n plek in die Bokke se Drienasies- en finale Wêreldbeker-groepe.
Hy word deur menige as ’n speler beskou wat ondanks sy goeie spel, en vanweë die oorvloed talent onder die Suid-Afrikaanse losvoorspelers, hom nog op die randjie van insluiting in die nasionale span bevind.
Maar die voormalige ysterman en kantman van die Springbokke, André Venter, sê Johnson het reeds sý regmerk om die Bokke in die Drienasies en Wêreldbeker te verteenwoordig.
“Ashley is die soort speler wat in ’n wedstryd die haas uit die hoed kan pluk. Sy invloed, hetsy dit direk of indirek is, op die Cheetahs se terugvegpogings en wedstryde waarin hulle die uitklophou plant, is ongelooflik,” sê Venter.
“Sy werkverrigting is hoog en sy vaardighede is goed. ’n Mens sien ook min dat hy met die bal doodgaan. Ashley is ’n speler wat gereeld op die regte tye en plekke opduik – ’n talent wat vital is.
“Op die oog af lyk hy dalk nie so vinnig nie, maar statistieke wys dat hy baie vaart het. Hy doen goeie goed – wat omgekeerde besit en stewige verdediging insluit.”
Die 25-jarige Johnson sal Saterdag hier teen die Sharks se Bokke soos Willem Alberts, Keegan Daniel en dalk ook Ryan Kankowski geweeg word.
Venter sê juis die Sharks se Alberts is nóg een van die losvoorspelers wat hy ’n regmerk sal gee om die Bokke vanjaar te verteenwoordig.
Veral vir die wyse waarop Alberts met sy krag, gewig en fisieke spel oor die voordeellyn storm om momentum aan sy span te gee.
“Die Cheetahs is egter bevoorreg om losvoorspelers van die gehalte van Juan Smith, Ashley en Heinrich Brüssow te hê. Hulle vorm ’n goeie kombinasie en ek sal ál drie sonder enige twyfel vir die Bok-groep kies,” sê Venter.
- In Smith en Brüssow se afwesigheid (albei is beseer), wag ’n groot uitdaging op die Cheetahs-lostrio Johnson, Johan Wessels en Davon Raubenheimer om die fisieke aanslag van Alberts-hulle af te weer.
Gelukkig vir die Cheetahs, wat ook sonder ander beseerde losvoorspelers soos Frans Viljoen, Kabamba Floors, Leon Karemaker en Philip van der Walt moet klaarkom, is die Sharks se ander vurige losvoorspeler Jean Deysel vir twee weke geskors.
Deysel is geskors vir ’n gevaarlike duikslag op die Waratahs-senter Tom Carter. Die Sharks het selfs in Deysel se afwesigheid nog genoeg diepte op losvoorspeler om die Cheetahs hope probleme in die losstryd te besorg.
Vir die jongste sportnuus volg Nuus24Sport op Twitter.
- Sport24