'Oorlog' wag teen Sharks
2012-02-23 08:59
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria – Die Sharks is ook, soos die Bulls, aan die herbou en besig om ’n volgende generasie spelers aan Super-rugby bekend te stel.
Dit is boonop albei spanne se eerste wedstryd van die nuwe seisoen en daarom meen hy Vrydag se stryd hier op Loftus Versfeld sal gewen word deur die span wat die “eerlikste en regte” 80 minute speel, het die Bulls se afrigter, Frans Ludeke, gesê.
“Ons is baie in dieselfde bootjie, so dit behoort te gaan oor wie die minste foute begaan, of nie foute op kritieke tye begaan nie en wie sy kanse die beste gaan benut.”
Ludeke wys daarop dat hoewel die Bulls met ’n hele paar nuwe gesigte opdraf, ’n paar aspekte van hul spel en spelers steeds dieselfde sal bly.
“Ons tegniese besluitnemers is vol ervaring en in die belangrikste posisies op die veld, so dit behoort in ons guns te tel.
“Daar het nie soveel verander in die manier hoe ons dinge wil doen nie. Daar is vars idees, maar die ou waardes het behoue gebly.”
Die breier het erken dat die Sharks se huidige peil vir hom ’n onbekende faktor is.
“Ons kon nie veel uit die Sharks se voorseisoen wys word nie, want dit was moeilik om die standaard van hul teenstanders te oordeel.
“Dit is egter nie moeilik om te voorspel dat hulle die bal gaan dra, dit in ruimte probeer kry en dit dan daar hou nie.”
Die Bulls se aanslag is tradisioneel meer direk en volgens Ludeke sal “die voordeellyn” die bepalende faktor wees.
“Die span wat dit gaan bepaal, behoort die wedstryd te wen. ’n Mens moet aanvaar dat alles nie al in die eerste wedstryd net in plek sal val nie, maar dit geld albei spanne.”
Die Bulls se kaptein, Pierre Spies, glo dat hoewel die Sharks self ’n paar nuwe gesigte gaan hê, “die gebruiklike konfrontasies” dieselfde gaan wees.
“Dit gaan weer ’n fisieke oorlog wees,” het hy voorspel.
Sy troepe is egter slaggereed en lê en wag in die loopgrawe.
“Ons benader die wedstryd met ’n goeie energie. Ons het hard gewerk om hier te kom, nou moet ons die volgende tree neem en die werk op die oefenveld ’n sukses op die speelveld maak.”
Vir die jongste sportnuus volg Nuus24Sport op Twitter.
– Sport24