Naka pos dalk kaptein in soeke na sege
2011-03-08 08:19
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Onvoorspelbaarheid kan die wagwoord wees in die soeke na ’n broodnodige eerste sege in die Super Rugby-reeks wanneer Naka Drotské, die Cheetahs-breier, sy span vir Saterdag se wedstryd teen die Lions hier aankondig.
Die sentrale streekspan is ná drie kragmetings steeds segeloos en Drotské kan besluit om te waag voordat die Cheetahs op hul oorsese toer vertrek.
’n Wysiging aan die tuisspan se wedstrydplan kan selfs beteken dat sy kaptein en losskakel, Naas Olivier, in die slag bly.
Die Springbok-flank Heinrich Brüssow is nie beskikbaar nie, maar Olivier se weglating kan een van ’n paar verrassings in die soeke na vier ligapunte wees.
Brüssow sal nie sy eerste wedstryd in die Superreeks teen die Lions speel nie en volgens Drotské sal hy eers wéér vir die Vrystaat se Vodacombeker-span uitdraf.
Nóg die Stormers nóg die Cheetahs kon verlede Saterdag op Nuweland veel op die aanval uitrig, maar Sias Ebersohn kan dalk ’n kans as losskakel teen die Lions kry.
Dit sal beteken dat die Cheetahs ook hul vierde kaptein in vier weke sal hê en die senter Andries Strauss behoort ’n sterk kandidaat vir die kapteinskap te wees.
Boonop sal die flank Frans Viljoen waarskynlik ná ’n dyspierbesering na die beginspan terugkeer, met Francois Uys of Kabamba Floors wat na die plaasvervangersbank sal skuif.
Die slot Martin Muller het in sy buiging teen die Stormers beïndruk en sal straks ’n kans in die beginspan kry.
Om Olivier te pos, klink miskien na ’n drastiese stap, maar sy taktiese spel was in die kragmeting met die Stormers nie heeltemal op peil nie.
Hoewel hy goed na die pale gekorrel het op Nuweland, kon Olivier nie werklik die spel dikteer nie.
As hy op sy beste is, is Olivier beslis die voorste losskakel in die streek.
Ebersohn is bekend vir sy aanvallende spel en het die vermoë om sy agterlyn goed weg te stuur.
Sy wisselvallige stelskopwerk is een rede waarom hy nog nie meer in die nr. 10-trui ingespan is nie.
Juis daarom kan Riaan Viljoen op heelagter gekies word.
Viljoen het teen die einde van die Stormers-kragmeting ’n strafdoel van byna 50 meter vir ’n bonuspunt behaal.
Bly op hoogte van al die jongste sportnuus deur Nuus24Sport op Twitter te volg.
- Sport24