Naka Drotské wys sy kaarte
2011-01-21 08:16
In-diepte Verslae
Die beseerde losvoorspelers CJ Stander en Dewald Potgieter kan straks gekies word vir die Bulls se Super-stryd teen die Chiefs in Hamilton.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Naka Drotské het Donderdagaand hier op Vodacompark in ’n kontaksessie tussen ’n Barbarians-rugbyspan van die Cheetahs en Ixias van die Sentrale Universiteit vir Tegnologie (SUT) die eerste keer van sy kaarte voor die Superreeks gewys.
Dié breier van die Cheetahs het in die sessie teen die Ixias sy tweede en derde keuses speelkans gegee en van sy planne ontbloot.
Die Cheetahs speel hul eerste oefenwedstryd Vrydag hier teen die Griffons en die breier wou onder meer teen die Ixias sien wie sy naasbestes gaan wees.
Volgens Drotské behoort min of meer dieselfde span as teen die Ixias die Perses te pak en was die kontaksessie ’n ekstra geleentheid vir sekere spelers om hul staal te toon.
Die slot Wilhelm Steenkamp het gewys dat hy nog ’n goeie kopie kan word en het veral in die lynstane sy werk deeglik gedoen. Hy bring ook die fisieke element na die voorspelers wat sy breier sal vereis.
Die senter Morgan Newman se uitstappie na die Rosestad behoort ook binnekort die moeite werd te word. Hy het dikwels verdedigers besig gehou en behoort die finale groep te haal.
Daar is beslis nog genoeg skop in die vleuel Fabian Juries en sy vleuelmaat Philip Snyman het oudergewoonte uitgetroon.
Die plaasvervanger-losskakel, Riaan (True Blue) Smit, het in die tweede helfte kans gekry en goeie rigting op die aanval gegee en dikwels self verdedigers oorhoeks gehad.
Die Cheetahs se Super-groep sou aanvanklik eers na hul oefenwedstryd op 4 Februarie teen die Southern Kings verklein word, maar dit sal volgens hul breier al ná die Griffons-kragmeting gebeur.
Daar kan aangeneem word dat die Cheetahs-bestuurspan sy sterkste 22-tal eers teen ’n gedugte Kings-span sal loslaat.
Volgens Drotské was die doel van die kontaksessie sodat veral nuwelinge ’n ekstra geleentheid kan kry.
“Daar is baie diepte in sekere posisies en ’n ou wil presies weet wie jou nommer een, twee en drie is. Daar is nog bietjie verwarring, veral oor die nuwe ouens soos Martin Muller, Morgan en Wilhelm wat hier is.”
* Die Barbarians-span teen SUT was: Riaan Viljoen, Philip Snyman, Corné Uys, Morgan Newman, Fabian Juries, Louis Strydom, Tewis de Bruyn, Philip van der Walt, Davon Raubenheimer, Kabamba Floors, Wilhelm Steenkamp, Martin Muller, Kobus Calldo, Ryno Barnes, Kevin Stevens. PLAASVERVANGERS: Skipper Badenhorst, Trevor Nyakane, Francois Uys, Johan Wessels, Piet van Zyl, Wilmaure Louw, Barry Geel, Riaan Smit.
Vir die jongste sportnuus volg Nuus24Sport op Twitter.
- Sport24