Mitchell stoot bors uit oor Lions
2011-04-18 09:52
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Dié slag was John Mitchell uiters trots op sy span.
Ofskoon die Lions se nederlaag Saterdag met 19-33 teen die Stormers hul tweede grootste van die Super Rugby-seisoen was, het die spelers ten minste gedoen wat hul afrigter gevra het.
Net jammer hulle het hier op Coca-Colapark teen Suid-Afrika se beste span te staan gekom.
Die Stormers het, met die telling op 26-19, ’n gelukkige drie aan die einde gedruk nadat die Lions nog met mening ’n verdoelde drie gejag het om die telling gelykop te maak.
“Ek dink ons het baie goed gedoen en ons voorspelers het veral goed reageer,” het Mitchell gesê met verwysing na die agttal se flou vertonings in veral die vaste fasette in die vorige paar wedstryde.
“Ons kon hul verdedigingslinie steeds nie op die regte tye breek nie, maar ek is baie trots op die ouens se poging.”
Doppies la Grange, die Lions se kaptein, het met ’n dik geswelde oog gesê hy weet daar was nie ’n gebrek aan gesonde houding en toewyding teen die Stormers nie.
“Ons het ongelukkig maklike drieë toegelaat. Ons wou vir die ondersteuners wys ons het meer trots as wat dit mag lyk,” het La Grange gesê.
Die keuse van Wikus van Heerden en David de Villiers as slotpaar was geslaagd, terwyl Burton Francis as losskakel straks vir hom ’n meer gereelde plek in die beginspan oopgespeel het.
Dan was die jong Lions-heelagter, Jaco Taute, weer die beste aanvaller in die tuisspan, en hy verdien sy plek in die beginspan.
Vir die Lions lê ’n wedstryd Saterdag op Coca-Colapark teen die Chiefs voor en ’n tuisoorwinning is ’n móét.
Daarna bly slegs hul Australasiese toer, en tuiswedstryde teen die Cheetahs en die Sharks oor.
’n Oorwinning oor die Chiefs lyk na ’n meer haalbare doelwit.
Die feit dat Mitchell sy trots uitspreek op ’n span wat Saterdag sy agtste uit nege wedstryde verloor het, sê heelwat oor die mate van realisme waarmee hy sy span se situasie bekyk.
“Realisties beskou, is ons omtrent sewe punte agter die ander spanne in die reeks,” het Mitchell erken.
“Dit is die posisie waarin ons is. Ons moet meer akkuraat word en glo ons kan dit doen.
As ’n span is ons nie ver weg daarvan nie – dit is net sewe punte en ons moet ’n houvas daarop kry.”
- Sport24
- Volg Nuus24Sport op Twitter.