Mense slaap by Nuweland vir kaartjies
2010-05-19 08:32
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kobus Pretorius
Kaapstad - Honderde geesdriftige Stormers-ondersteuners het Dinsdagoggend vroeg op Nuweland toegesak in ’n desperate poging om kaartjies vir hul span se Super14-halfeindstryd teen die Waratahs te koop.
Dit is die Stormers se eerste tuis-halfeindstryd in 11 jaar.
Baie mense het Maandagnag by die stadion deurgebring sodat hulle heel eerste in die tou kon wees wanneer die kantore om 09:00 sou oopmaak.
Die slaapsakke, matrasse, komberse en kampeerstoele het sterk herinner aan die finale ronde van kaartjieverkope vir die Wêreldbeker-sokkertoernooi net meer as ’n maand gelede.
Die gees onder die mense – mans én vroue – was positief, met heelparty wat ’n tydjie by die werk moes afknyp om daar te wees, terwyl ander die dag verlof geneem het.
Mnr. Theo Fortuin van Hanover Park was gister heel eerste in die tou nadat hy hom Maandag om 20:30 reeds daar tuisgemaak het. Hy het 10 kaartjies gekoop.
“Die Stormers gaan definitief Saterdag wen,” het hy aan Die Burger gesê en ’n telling van 38-12 in die tuispan se guns voorspel.
Mnr. Chris Groenewald van Brackenfell, wat vyfde in die tou was en van 21:00 gewag het, reken die Stormers gaan met 32-18 wen.
“Ek is redelik seker dat ons Saterdag gaan wen. Hulle speel voor ’n tuisskare. Die Bulle gaan ook net-net wen, maar dit sal lekker wees as die eindstryd op Nuweland kan wees.” Mnr. Dawood Williams van Athlone was agtste in die tou en sou 20 kaartjies vir vriende en familie van so ver as Port Elizabeth koop.
Hy het oorwinnings vir die Stormers en die Bulls voorspel.
Ook mnr. Theuns Kleinhans, al die pad van Bloemfontein met ’n blou pruik op die kop, het agt kaartjies gekoop en was vol vertroue dat die Stormers gaan wen.
“Die eindstryd gaan tussen die Stormers en die Crusaders op Nuweland wees. Dit gaan ’n naelbytstryd wees, maar die Stormers behoort 25-18 te wen.”
Me. Hannetjie Oberg van Melkbosstrand het gister verlof geneem om kaartjies te koop. Sy het saam met haar seun, wat by die Universiteit Stellenbosch studeer en vandag ’n toets moet skryf, in die tou gestaan.
Volgens die webwerf www.iamastormer.com was alle sitplekkaartjies teen gisteraand uitverkoop en was daar nog net 300 staankaartjies beskikbaar.
Daar sal moontlik deur die loop van die week nog kaartjies beskikbaar raak.
Bly op hoogte van al die jongste sportnuus deur Nuus24Sport op Twitter te volg.
- Sport24