Mapoe-skuif skok Cheetahs
2010-05-20 10:01
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Hendrik Cronjé
Bloemfontein - Lionel Mapoe, ’n ster-vleuel van die Cheetahs, het hom in die geheim by die Sharks aangesluit en dié 21-jarige Blitsbok was reeds die afgelope week in Durban by sy “nuwe” spanmaats.
In Cheetahs-geledere is daar groot konsternasie oor Mapoe se “verdwyning” uit die Vrystaat en onverwagse verskyning by die Sharks.
Niemand in Vrystaat-rugby se bestuur het geweet van Mapoe se skok-skuif nie en is verslae en ontstoke oor die beweerde afrokkeling van een van hul top-spelers.
Harold Verster, president van die Vrystaatse Rugby-unie (VRU), hou vol dat die Cheetahs ’n “waterdigte en geldige kontrak met Mapoe het”. Alles dui nou daarop dat die rugbyunies van die Vrystaat en die Sharks op ’n regsgeding afstuur wat eindelik die Suid-Afrikaanse Rugbyunie kan betrek.
In die laaste maande was die Sharks in ’n stryd met die Goue Leeus se Rugby-unie betrokke oor twee Lions-spelers – Louis Ludik en Willem Alberts.
Vroeër was die Lions ook in ’n regsgeding met Jaque Fourie betrokke oor sy skuif na die Westelike Provinsie. Mapoe se agent en ’n voormalige vleuel van die Vrystaat, Jan-Harm van Wyk, wou nie gister veel oor Mapoe se skuif na Durban sê nie.
“Die saak is sub judice en in die hande van Lionel se prokureur,” het Van Wyk gesê.
Daar was aanvanklik sprake dat Mapoe ook in die visier van die Blou Bulle was. Hulle het toe ’n plaasvervanger vir Bryan Habana gesoek. Verster het gesê die Cheetahs het ’n geldige kontrak met Mapoe wat tot 31 Oktober 2011 strek.
“Ons het senior regsadvies oor die geldigheid van sy kontrak ingewin en is oortuig dat ons ’n geldige kontrak het,” sê hy. “Ons sal nie ’n sertifikaat van vrystelling aan Mapoe uitreik om elders te gaan speel of oefen nie. As dít wel die geval is of gebeur, sal die VRU stappe teen die betrokke persone doen.“Mapoe is ’n talentvolle speler wat ons reeds op skolevlak geïdentifiseer het om vir hom ’n kontrak as ’n junior aan te bied. “Hy het ons kontrak van drie jaar aanvaar.”
Mapoe was vroeër vanjaar in ’n toutrekkery tussen die VRU en sy verteenwoordigers vasgevang oor sy karige salaris by die Cheetahs.
Die Cheetahs het daarna wyd na borgskappe gesoek om sy kontrak aansienlik te vermeerder en was oortuig dat sy ongelukkigheid iets van die verlede is.
“Ons het spontaan en uit eie beweging sy kontrak aangepas – volgens ons is dít erg markverwant. Hy is ’n Vrystaat-seun en gaan bly vir die tydperk van sy kontrak,” het Verster gesê.
Mapoe kon weens ’n skouerbesering in min van die Cheetahs se Super14-wedstryde in 2010 speel, maar word vanweë sy grootte, lengte, krag en lugspel as ’n seker keuse vir die Bokke se toer aan die einde van die jaar na Europa beskou.
Mapoe was ironies genoeg nog Saterdag in Welkom in ’n Cheetah-sweetpak geklee toe die sentrale streekspan in ’n Super14-wedstryd teen die Lions gespeel het.
Bly op hoogte van al die jongste sportnuus deur Nuus24Sport op Twitter te volg.
- Sport24