Mapoe glo in Bulle se visier
2010-03-18 09:15
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Hendrik Cronjé en Johann Thormählen
Bloemfontein - ’n Geldbom het oor die kop van die Cheetahs se ster-vleuel Lionel Mapoe gebars – wat kan meebring dat dié 21-jarige Vrystater sy rugbyloopbaan binnekort by die Blou Bulle sal voortsit.
Mapoe is in ’n toutrekkery tussen die Vrystaatse Rugby-unie (VRU) en sy verteenwoordigers vasgevang oor sy salaris by die Cheetahs.
Die VRU se prokureurs het vandag ’n ontmoeting met Mapoe s’n.
Tydens dié ontmoeting kan bepaal word of Mapoe se kontrak geldig is en of hy dadelik deur die Bulle teen glo sowat R1,4 miljoen gekontrakteer kan word.
Sport24 se bronne het gesê Mapoe verdien tans sowat R29 500 per maand tydens die Super14-reeks, wat die voorskriftelike minimum salaris van ’n SA speler in die Super14-reeks is.
Mapoe is in 2008 as ’n heel onbekende opkomeling by die Cheetahs teen R80 000 per jaar vir drie jaar met ’n jaarlikse vasgestelde verhoging gekontrakteer.
Hy het in 2009 nog vir die Vrystaat se o.21-span uitgedraf en eers later die seisoen sy stempel vir die senior span in die Curriebekerreeks afgedruk, waarna die Cheetahs besluit het om sy salaris te verhoog.
Die Cheetahs is nou bereid om sy salaris binne die volgende 24 maande glo tot R750 000 per jaar te verhoog mits hy bereid is om sy kontrak tot 2012 te verleng.
Mapoe se verteenwoordigers meen sy huidige salaris is nie naastenby markverwant nie.
Harold Verster, president van die VRU, het aan Sport24 bevestig hy het ’n prokureursbrief van dié verteenwoordigers ontvang waarin die geldigheid van Mapoe se kontrak bevraagteken word.
“Daar is ’n kwessie met Mapoe se kontrak.
Sy agent, Red Star Talent, en meer spesifiek Mike de Haast, kyk na die aangeleentheid deur prokureurs. Die saak is sub judice omdat ons deur die prokureurs onderhandel en daar is Donderdag (vandag) ’n ontmoeting tussen die partye,” sê Verster.
“Dis jammer dat sulke dinge altyd opduik voor ons ’n groot Suid-Afrikaanse span pak.
“Dit ontstel die span en die spelers.
“Dis jammer dat ons eie mense in Bloemfontein ons span op so ’n strategiese tydstip ontstig.”
Verster het gesê Mapoe is ’n ster en die Cheetahs wil hom graag behou.
“Ons het tot dusver baie goed na hom omgesien,” het Verster bygevoeg.
“Hy het verlede jaar, toe hy ’n kniebesering opgedoen het , nie tot ’n mediese fonds behoort nie – sy agente het nagelaat om hom by ’n mediese fonds te laat aansluit.
Vrystaat-rugby het R25 000 vir sy knie-operasie betaal. Hy het ook tot onlangs die afgelope twee jaar verniet by ons in die Cheetah-huis gebly.”
De Haast het gesê die Bulle het geen aanbod aan Mapoe gemaak nie.
“Lionel is toegewyd aan die Cheetahs en sien uit na Saterdag se wedstryd teen die Stormers.”
Mapoe was verlede jaar een van die spelers wat homself ongelukkig kon ag om nie die Springbok-toerspan na Europa te haal nie.
- Sport24