Luke uit, maar maan maats oor fluitjie
2012-02-10 08:59
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Michael Green en Stephen Nell
Port Elizabeth. – Luke Watson teen Schalk Burger was veronderstel om ’n groot trekpleister te wees, maar nou gaan nie een van dié twee losvoorspelers in Saterdag se opwarmstryd tussen die Southern Kings en Stormers speel nie.
Watson het hom met ’n seer skouer aan die rugbywedstryd onttrek en sal dus nie hier in die Nelson Mandelabaai-stadion teen sy ou span speel nie.
Vleis Engelbrecht sal nou na agtsteman skuif, met Boetie Britz wat van die Kings se plaasvervangersbank af in Engelbrecht se plek op flank inskuif.
Die ervare slot Darron Nell sal die span in Watson se plek lei.
Watson het wel waardevolle raad vir sy spanmaats gehad, veral nadat die Kings verlede week teen die Bulls onder die skeidsregter Stuart Berry se fluitjie deurgeloop het.
“Verlede week kon die spel weens al die strafskoppe nie vloei nie. Die skeidsregters kry elke jaar iets waaraan hulle spesiale aandag gee.
“Ons kan nie die fout maak om dit te ignoreer nie. Ons moet spesiale aandag daaraan gee anders gaan ons spyt wees.”
Lourens van der Merwe blaas Saterdag en sal die afbreekpunte en die vaste skrums fyn dophou.
Die Kings het ook in die lynstane teen die Bulls les opgesê met Wilhelm Steenkamp wat hulle ore aangesit het. Met Andries Bekker, wat omtrent soos die Toring van Babel in ’n lynstaan uittroon, kan die Kings weer probleme verwag.
David Bulbring, die man wat die Kings se lynstaantekens uitroep, sal sy storie moet ken.
Wat die vaste skrums betref, het Alan Solomons, die Kings- breier, gesê hy soek ’n verbetering. Daar was wel min skrums teen die Bulls, maar dit het gelyk of die Kings gesukkel het om die skrums reguit te hou.
Solomons is minder bekommerd oor wen of verloor as die toekoms van die Kings.
“Dis nou nog ’n kwessie van die huidige spelers wat moet bewys dat hulle deel van ons planne vir aanstaande jaar se Super-reeks moet wees. Die uitslag is irrelevant,” het hy gesê.
Solomons het strukture in die streek gevestig om seker te maak dat die Kings mettertyd mededingend op streekvlak kan wees.
“Hier is nou ’n goeie akademie, ’n rugby-afdeling en mediese strukture. Ek het ook ’n omvattende strategiese plan opgetrek. Dit sluit die werwing van spelers in,” het hy gesê.
“Die Oos-Kaap het nog nie in die beroepsera Super-rugby gehad nie. Dis fantasties vir die streek om dit nou te kry.
“Die swart gemeenskappe hier was nog altyd versot op die spel en die toekenning van ’n streekspan sal rugby hier laat herleef.”
Intussen moet Solomons maar met ’n gelapte span teen die Stormers speel. Devin Oosthuizen (losvoorspeler), Joe Snyman (slot), SP Marais (heelagter), Jongi Nokwe (vleuel), Siyanda Grey (senter) en George Whitehead (agterspeler) is beseer.
Vir die jongste sportnuus volg Nuus24Sport op Twitter.
– Sport24