Lions te goed vir Kings in Baai
2011-02-12 08:23
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Port Elizabeth - Dis ook maar goed die Lions het hul groot name by die huis gelos vir Vrydagaand se kragmeting hier in die Nelson Mandelabaai-stadion met die Southern Kings.
Die Lions het die vriendskaplike wedstryd met 30-24 gewen nadat hulle met die rustyd met 22-10 voorgeloop het.
Vir ’n groot gedeelte van die wedstryd het die besoekers die kitaar geslaan.
Dit was duidelik dat die sogenaamde minder bekende spelers van die Lions nie Baai toe gekom het om naam weg te gooi nie.
Die Kings het nes verlede week teen die Cheetahs weer swak begin.
Die besoekers het hul eerste drie reeds in die sewende minuut gedruk toe die sterk senter Joubert Engelbrecht ’n gaping gevind het en deurgedraf het.
Dit was nadat die Kings eintlik op die aanval was, maar die bal ná ’n misverstand in die lynstaan verloor het.
Van daar het die spel na die Kings se helfte beweeg en het die Lions vir ’n tyd lank beheer geneem.
Twee minute ná Engelbrecht se drie het Tonderai Chavhanga, die Lions se blitsige linkervleuel, ook deurgenael vir ’n drie.
Asof dit nie genoeg was nie, het die Lions in die 20ste minuut ’n derde drie gedruk. Dié keer was dit die Lions se ander senter, Jannie Boshoff, wat ’n gaping gevind het.
Dit was in dié stadium verstaanbaar dat die Kings se ondersteuners ongemaklik begin rondskuif het, maar hul span het darem kort voor rustyd teruggeslaan toe die groot stut Ronnie Uys oorgebars het vir ’n drie ná aanhoudende dryfspel deur die tuisspan.
In die kwartier voor die rustyd moes die Kings nog ’n drie gedruk het toe hulle meer manne in die agterlyn gehad het as die besoekers, maar die senter Siyanda Grey te lank aan die bal geklou het.
Die eerste helfte is gekenmerk deur die Lions wat flink op die aanval vertoon het en die Kings wat huiwerig was.
Ook in die tweede helfte was daar tye wanneer die Kings op die Lions se doellyn besluiteloos voorgekom het.
Die tweede helfte het wel ’n baie beter poging van die Kings opgelewer.
Dit was veral toe die loskopstut Jaco Engels sy verskyning as plaasvervanger gemaak het, dat daar skielik meer vuur was.
Engels het dadelik ’n impak in die skrums gemaak en sy teenwoordigheid het sy spanmaats aangespoor.
Die Kings is vir hul veggees met nog twee drieë beloon, maar die Lions het die laaste gelag toe die flank Jaco Kriel 14 minute voor die einde gaan druk het.
Hoewel hulle nie oordonder is nie, het die nederlaag gewys daar wag nog harde werk vir die Kings.
Dis ook duidelik dat die span nog as ’n eenheid moet groei – iets wat sy afrigter, Alan Solomons, juis vooraf gesê het.
Puntemakers:
Lions 30 (22):
Drieë: Tonderai Chavhanga, Jannie Boshoff, Joubert Engelbrecht, Jaco Kriel.
Doelskoppe: Hein Cronjé (2).
Strafdoele: JP Joubert, Cronjé.
Kings 24 (10):
Drieë: Ronnie Uys, Paul Perez, Boetie Brits.
Doelskoppe: Jaco van Schalkwyk, Monty Dumond (2).
Strafdoel: Van Schalkwyk.
Bly op hoogte van al die jongste sportnuus deur Nuus24Sport op Twitter te volg.
- Sport24