Lions span 50 spelers in twee jaar in
2011-05-10 09:18
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Die soektog na ’n Bakkies Botha en ’n Victor Matfield vir Lions-rugby is een van die diepgewortelde probleme waarmee dié Super Rugby-sukkelaars worstel.
Terwyl die Lions-afrigter, John Mitchell, tot dusver vanjaar, ondanks die span se verloorgewoontes, sy bes probeer het om die snoeiskêr te spaar, het hy sy slotpaar telkens verander.
Lynstaanwerk is die grootste kopseer en die meeste spanne maak vanjaar maalvleis van die Lions-lynstane.
Mitchell erken ook dit ontneem sy span telkens die kans om ’n aanval uit ’n goeie posisie te loods.
Franco van der Merwe, George Earle, Wikus van Heerden, Michael Rhodes, David Bulbring en David de Villiers het almal vanjaar speelkans gekry, maar nie een van dié spelers het hulle al gevestig nie.
Die 32-jarige Van Heerden, wat vanjaar van ’n losvoorspeler in ’n slot verander is, verdien van dié spelers waarskynlik vanweë sy hoë werkverrigting die meeste lof.
Van der Merwe is uit die staanspoor as ’n eerste keuse beskou, maar sy spelpeil het gedaal en hy is selfs van die kapteinskap onthef.
Tog is Van der Merwe, Van Heerden, De Villiers en Rhodes die manne wat die toergroep na Australasië gehaal het, maar daar bestaan min sekerheid oor watter kombinasie in die beginspan moet opdraf.
Mitchell het nie met ’n nuwe probleem te doen nie.
Sedert Dick Muir verlede jaar die soveelste “bouproses” begin het, is altesaam 50 spelers deur dié franchise in Super Rugby ingespan.
Die senter Dylan des Fountain het Vrydag teen die Cheetahs die 50ste Lions-speler die afgelope twee seisoene geword.
Dié groep spelers het die Lions slegs een oorwinning in 24 wedstryde besorg.
Altesaam 10 slotte is in dié tydperk gebruik en dit sluit veterane soos Willem Stoltz, Nico Luus en Jacques Lombaard in.
Goeie besit uit die vaste fasette sal ’n voorvereiste vir die Lions op hul Australasiese toer wees wat Saterdag in Canberra met ’n kragmeting met die Brumbies begin.
Dit kan die druk van die Lions se losskakel afhaal.
Saterdag behoort dit weer Burton Francis te wees, met Elton Jantjies en André Pretorius wat ook vanjaar sonder veel sukses in dié posisie gekies is.
Butch James, wat hom Woensdag by die Lions aansluit, kan moontlik Saterdag die 34ste Lions-speler word wat vanjaar onder Mitchell se afrigting vir die span speel.
James behoort ’n plaasvervanger teen die Brumbies te wees.
Muir het verlede jaar 41 spelers in sy span se 13 nederlae in die Super 14-reeks ingespan.
Slegs 14 van dié spelers was vanjaar weer in Mitchell se planne.
Vir die jongste sportnuus volg Nuus24Sport op Twitter.
- Sport24