Lions sonder Elton, Doppies op Nuweland
2011-01-25 09:56
In-diepte Verslae
Allister Coetzee, wat uit verskeie oorde gekritiseer is oor Jebb Sinclair se insluiting, het sy soektog na 'n oorsese losvoorspeler laat vaar.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Die Lions gaan Woensdag sonder hul jong Springbok-losskakel Elton Jantjies op die vliegtuig na Kaapstad klim vir die voorseisoense Neo Africa-reeks teen die Stormers en die Sharks.
Jantjies en die staatmaker-senter Doppies la Grange gaan tuis bly en op hul kondisionering fokus sodat hulle slaggereed kan wees vir die begin van die Super Rugby-reeks op 19 Februarie.
Die Lions se afrigter, John Mitchell, sê Jantjies het weens sy betrokkenheid by die Springbokke se toer na Brittanje verlede jaar ’n paar weke se kondisionering misgeloop en daarom gaan hy eers oor ’n paar weke in ’n vriendskaplike wedstryd losgelaat word.
Wat La Grange betref, weet die Lions reeds wat hulle in dié gesoute senter het en daarom gaan die beskikbare reserwekrag vir die binnesenter-posisie teen die Stormers en die Sharks op die proef gestel word.
Jantjies se afwesigheid beteken dat die voormalige Bok André Pretorius waarskynlik as losskakel in Vrydagaand se wedstryd teen die Stormers sal uitdraf.
Pretorius het verlede jaar nog vir die Haaie in die Curriebeker-reeks gespeel en behoort nog ’n Haai-aanwins, Rory Kockott, as sy skakelmaat te hê.
Altesaam 29 spelers gaan na Kaapstad reis en hoewel die meeste van hulle speelkans behoort te kry, gaan Kockott en Michael Bondesio waarskynlik as skrumskakels geweeg word, aangesien Jano Vermaak se vermoëns ook welbekend aan die Lions-afrigtingspan is.
La Grange gaan ’n baie interessante plaasvervanger teen die Stormers hê. Die 19-jarige Jaco Taute, wat in die Curriebeker-reeks as heelagter beïndruk het, gaan straks as binnesenter langs Waylon Murray geweeg word.
Die Blou Bul-aanwins Bandise Maku (haker) en die voormalige Vrystater Lionel Mapoe (vleuel) gaan ook hul buiging vir die Lions teen die Stormers maak.
Mitchell gaan ook ’n paar ander spelers met die oog op hul kondisionering tuis los.
Dit sluit die Nieu-Seelandse heelagter James Kamana, asook Michael Rhodes (slot/flank), David de Villiers (slot), Pat Cilliers (stut) en Wayne Swart (stut) in.
Intussen het die voormalige Springbok- en Leeus-kaptein Francois Pienaar sy tevredenheid met die nuwe ontwikkelinge in Leeus-rugby uitgespreek.
Benewens die span se verbeterde spel onder Mitchell in die Curriebeker-reeks verlede jaar, het die unie ook finansiële spierkrag gekry met die sluit van ’n vennootskap met die Guma-groep en die onlangse titelborgskap van MTN. “Ek dink dit was vir almal sleg toe die Leeus so gesukkel het, selfs vir die spelers en die administrateurs.
“Maar ek volg dit wat by die Leeus gebeur en dit lyk goed. John Mitchell is ’n skitterende afrigter en dit lyk of hy nou ’n lekker span het,” het Pienaar gesê.
Vir die jongste sportnuus volg Nuus24Sport op Twitter.
- Sport24