Lions ‘kort net vertroue, geluk’
2010-03-10 10:23
In-diepte Verslae
Die afrigter van die Sharks, John Plumtree, het sy span aangekondig vir die vriendskaplike wedstryd teen Boland op Kingspark in Durban.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pieter Jordaan
Johannesburg - ’n Oorwinning oor die Waratahs is geensins buite die Lions se bereik wanneer die rugbyspanne Vrydag in Sydney in die Super14-reeks kragte meet nie.
Die Lions-afrigter, Dick Muir, en sy troepe glo hulle kan met ’n bietjie meer geluk binnekort spogspanne in die reeks bloedneus gee.
“Ja ons kan wen. En ons voel nog heeltyd dat ons ’n wenkans het,” het Muir Dinsdag oor sy span se nederlae teen die Stormers, Chiefs, Hurricanes en Brumbies gesê.
“Dit gaan net oor selfvertroue. En ons moet dom foute uitskakel, soos die baie strafskoppe wat ons afstaan.
“Bygesê, ’n hele paar skeidsregterbeslissings het sover teen ons gegaan en ons het regtig ook ’n bietjie geluk nodig.”
Behalwe dat die Lions met net 9 punte teen die Brumbies verloor het, is die druk ook groot op die Waratahs om húl spelpeil te lig.
Die Waratahs se eie ondersteuners het hulle uitgejou in Saterdag se oorwinning van 25-21 oor die Sharks.
Dit was grootliks omdat die Waratahs telkens die bal geskop het wanneer die toeskouers aanvallende rugby wou sien.
Hul afrigter, Chris Hickey, het vandeesweek die hoop uitgespreek dat sy spelers die skare Vrydag kan vermaak. Muir se Lions wou teen die Brumbies hul aksiebelaaide benadering voortsit, maar die reënweer het dit verhoed.
’n Mens kan verwag dat albei spanne goeie aanvallende rugby gaan probeer speel as die speelveld droog is.
Die skrumskakel Jano Vermaak en vleuel Wigan Pekeur het hulle intussen by die Lions-toergroep aangesluit.
Volgens Muir sal ’n besluit in die week geneem word oor Vermaak se deelname aan die wedstryd teen die Waratahs.
Die losskakel Carlos Spencer is een van verskeie spelers wat nie in die beginspan teen die Brumbies was nie, wat wel behoort te speel.
“Ja, daar sal ’n hele klomp veranderings wees,” het Muir gesê.
“Dit sal weer nader aan ons oorspronklike beginspan (wat in die eerste drie wedstryde gespeel het) wees.”
- Die Burger