Lions-breier se geduld raak op
2011-04-25 11:00
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg – Die Lions word vandeesweek die laaste span wat ’n loslootjie in die Super Rugby-reeks kry en beklee die laaste plek op die puntelys, maar is eerste om te erken hoeveel tekortkominge hulle het.
Hul hoop om ten minste die Chiefs – wat voor Saterdag se wedstryd op Coca-Colapark laaste van tussen Nieu-Seeland se spanne op die puntelys getel het – te klop, was eindelik vergeefs.
Slegs tuiswedstryde teen die Cheetahs en die Sharks, en ’n genadelose toer na Australasië bly oor vir die Lions en die kans lyk al hoe groter dat slegs die Cheetahs vanjaar ’n Lions-slagoffer gaan wees.
Die Chiefs het Saterdag met 34-30 geseëvier en was dit nie vir ’n indrukwekkende impak deur die Lions-plaasvervangers nie, het die telling erger gelyk.
John Mitchell, die Lions-breier, het laat blyk dat sommige van sy spelers onder die valbyl gaan beland wanneer die Lions die volgende naweek ná hul loslootjie weer in aksie is.
“Ons is laaste om die loslootjie te kry. As ek terugkyk (na die seisoen tot dusver) ontbreek ’n sielkundige gehardheid steeds.
“Ons is steeds sag in ons koppe en daarom kan ons nie weekliks intensiteit na die veld toe bring nie.
Al wat dié wedstryd (teen die Chiefs) benodig het, was intensiteit deur ons verdedigingslinie in die eerste helfte.
“Ek is seker ons sou dan gekry het waarna ons op soek was.”
Mitchell het gesê hy is keelvol daarvoor om verskonings te maak.
“Dieselfde probleme duik elke slag op. Sommige individue laat my geen keuse in terme van my beplanning vir die toekoms nie,” het hy waarskuwend gesê.
“Ek is al lank by hierdie spel betrokke. Jy moet dit (sukses) verdien en op die oomblik doen ons dit nie.”
Saterdag was dit weer swak lynstaanspel, ’n gebrek aan konsentrasie by die afbreekpunte en ’n paar verbroude duikslae wat die Lions geknou het.
Die Chiefs het drie drieë in die eerste helfte en twee ná rustyd gedruk, maar die Lions kon eers laat in die wedstryd twee drieë by Michael Killian se vroeë pragdrie voeg.
Doppies la Grange, kaptein van die Lions, was byna sprakeloos oor sy span se soveelste naelbyt-nederlaag.
“Ons het die hele week daaroor gepraat om vir 80 minute te speel en om nie sagte drieë toe te laat nie. Ons het presies die teenoorgestelde gedoen.
“Dit is teleurstellend. Ja, wat kan ek sê?” was La Grange se terugblik op gebeure.
Hoewel die Lions-losskakel, Burton Francis, se stelskopwerk goed was, het die afrigter ook gesê sy skakelpaar het nie die soort beheer oor die wedstryd uitgeoefen wat nodig was nie.
Killian en Lionel Mapoe was knap op die aanval, en Cobus Grobbelaar se inklimspel is deur die plaasvervanger-flank Josh Strauss nagedoen.
Maar verder was daar min om oor huis toe te skryf oor die Lions se negende nederlaag.
“Dis hoe ons seisoen verloop. Wanneer een ding reggestel word, loop iets anders verkeerd,” het Mitchell gesê.
Puntemakers:
Chiefs 34 (19) : Drieë: Scott Waldrom (2), Romana Graham, Toby Smith, Dwayne Sweeney. Doelskoppe: Stephen Donald (3). Strafdoel: Donald.
Lions 30 (13): Drieë: Michael Killian, Josh Strauss, Cobus Grobbelaar. Doelskoppe: Burton Francis (2), Rory Kockott. Strafdoele: Francis (3).
– Sport24
Bly op hoogte van al die jongste sportnuus deur Nuus24Sport op Twitter te volg