Lions, Bulls ‘desperaat’
2011-03-22 07:36
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - “Laat ek jou sê, die Stormers het ons geen guns bewys nie.”
Dít is die Lions-senter Doppies la Grange se reaksie op ’n vraag oor sy verwagtinge vir Saterdag se kragmeting met die Bulls op Loftus Versfeld.
Sowel die Lions as die Bulls het in die naweek bloedrooi gebloos ná teleurstellende vertonings toe hulle onderskeidelik teen die Force en die Stormers vasgeval het.
Dit maak Saterdag se tweede Gautengse derby in vanjaar se Super Rugby-reeks ’n groot stryd, want hul nederlae in die naweek het die druk kwaai laat oplaai.
“Dit gaan ’n klipharde wedstryd wees, want dit is twee desperate spanne.
“Dit hang af wie die oorwinning die meeste wil hê,” sê La Grange.
“Ons sal in die spieël moet kyk en vir onsself vra: ‘hoor hier, wil jy bo uitkom of nie’?”
Dié ervare senter se afwesigheid het Saterdag beslis ’n leemte by die Lions in hul nederlaag teen die Western Force gelaat.
Hy het met ’n ligte enkelbesering gesukkel en die Lions-afrigtingspan wou nie met hom teen die Force waag nie.
Maandag was La Grange weer voluit aan die oefen en het gesê sy span sal slegs weer opstaan indien hy van die houding wat hy teen die Force uitgestraal het, ontslae raak.
“Ons het veral in daai laaste halfuur sonder die attitude wat ons in die vorige westryde gehad het, gespeel.”
Die Lions het in die tweede helfte vir ’n kort rukkie met ’n punt voorgeloop voordat hulle dié voorsprong prysgegee en die Force eindelik met 27-15 gewen het.
“Ons kon nie glo ons het só agteruitgegaan nie.
“Daardie attitude kom by elke speler vanself na vore.
“Ons het dit elke week nog gewys, daarom is ons so ’n bietjie skaam oor hoe ons gespeel het,” het La Grange gesê.
Die vraag is of die gewonde Lions of die gewonde Bulls die gevaarlikste gaan wees?
Sleutelspelers uit albei spanne was in die naweek benede peil.
By die Lions is die losskakel Elton Jantjies veral in die spervuur, maar La Grange glo daar is ander spelers wat ook skuld moet dra.
“Ek dink ek en ons ander besluitnemers op die veld moet hom ’n bietjie meer help.
“ ’n Ou soos Patrick Lambie speel goed by die Sharks, want hy het daardie ondersteuning.
“Op die oomblik maak ons dit nie maklik genoeg vir Elton nie.
“Hy is ’n uitstaande speler, maar hy het net daardie selfvertroue nodig.
“Ons moet sy ondersteuningstelsel wees en hom weer kry om die basiese dinge goed te doen.
“Dan kan ons net vorentoe gaan.”
La Grange se terugkeer behoort ten koste van Jannie Boshoff te gebeur.
Die Lions-krukkelys is tans redelik kort, hoewel ligte beserings aan die gesoute plaasvervanger Cobus Grobbelaar (skouer) en Wikus van Heerden (dyspier) deur die week dopgehou sal word.
Vir die jongste sportnuus volg Nuus24Sport op Twitter.
- Sport24