Leeus in die duister oor aanrandingsklag
2011-06-02 08:12
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg. – Dit is vyf dae sedert ’n Leeu-rugbyspeler na bewering ’n 18-jarige Nieu-Seelandse meisie in Dunedin seksueel aangerand het – en steeds is die Goue Leeus-Rugbyunie (GLRU) en die Leeus-spanbestuur in die duister daaroor.
Die identiteit van die speler is steeds nie bekend nie en daarom meen Kevin de Klerk, president van die GLRU, daar is geen rede tot kommer nie.
Die polisie in Dunedin, waar die voorval luidens berigte enkele ure ná die Leeus se oorwinning verlede Saterdag oor die Highlanders by ’n kroeg plaasgevind het, sou glo beeldmateriaal van ’n kringtelevisiekamera buite die kroeg bestudeer.
Intussen het die Leeus reeds na die hoofstad Wellington vertrek vir hul wedstryd Saterdag teen die Hurricanes.
“As daar enige waarheid daarin gesteek het, sou ons as uniebestuur teen dié tyd lankal daarvan gehoor het, maar niemand het met ons in verbinding getree nie,” het De Klerk gesê. “En buitendien, as dit so ’n ernstige saak was, sou hulle die speler mos nie toegelaat het om na Wellington te reis nie?”
De Klerk het gesê die GLRU het, in die lig van die slegte publisiteit wat met die beweerde voorval gepaard gaan, nog nie self met die Dunedinse polisie in verbinding getree nie. “My benadering daaroor is dat ons nie iets wil najaag wat nie bestaan nie.”
Intussen het nóg ’n Super Rugby-span sy hande in onskuld gewas oor dié beweerde voorval.
Die Western Force, wat voorheen deur die huidige Leeu-afrigter, John Mitchell, gebrei is, het ook die afgelope naweek in dieselfde hotel in Dunedin as die Leeus tuisgegaan. Die Force meet die naweek met die Highlanders kragte.
“Die Western Force is op geen manier betrokke by die beweerde voorval nie,” het die span se uitvoerende hoof, Vern Reid, in ’n verklaring gesê.
“Die span (Force) is nie deur die plaaslike owerheid gekontak nie en ná ons eie interne ondersoek is ons heeltemal tevrede dat geen lid van die toergroep daarby betrokke was nie.”
Die Nieu-Seelandse webtuiste, stuff.co.nz, het ook intussen berig dat die beweerde slagoffer, ’n student aan die Universiteit van Otago, sedertdien deurgaans ondersteuning kry.
’n Polisiewoordvoerder, Kallum Croudis, het glo gesê die polisie sal eers later vandeesweek ’n verklaring oor die voorval uitreik.
“Ons verantwoordelikhede teenoor die slagoffer weeg in dié stadium swaarder as ons verantwoordelikheid teenoor die publiek,” het hy gesê.
Volg Nuus24Sport op Twitter.
- Sport24