Kwaai slag tref Sharks
2012-01-28 07:06
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg – Die Sharks se seisoen het op ’n baie vals noot afgeskop met die nuus dat hul Springbok-stut Beast Mtawarira tot drie maande buite aksie kan wees nadat hy sy enkel Vrydagoggend in ’n kontak-oefensessie gebreek het.
Hy word Saterdagoggend geopereer en selfs vir die nuwe Springbok-rugbyafrigter, Heyneke Meyer, sal dit nie die soort nuus wees wat hy wil hoor só kort nadat hy die leisels oorgeneem het nie.
Volgens die spandokter van die Sharks, Ewoudt van der Linde, was dit ’n fratsongeluk.
“Beast was in besit van die bal en in ’n duikslag op hom het hy skeef op die enkel neergekom en dit gebreek,” het hy gesê.
Vir die Sharks is dit verpletterende nuus om een van hul voorrymanne te verloor net voor die Super-rugbyseisoen begin.
“Dit is ’n kwaai slag vir ons, maar een van daardie dinge wat jy maar moet aanvaar as deel van die spel,” het hul afrigter, John Plumtree, gesê.
“Jannie du Plessis kan darem aan albei kante speel, terwyl Dale Chadwick ’n goeie Curriebeker-seisoen gehad het en nou die volgende stap sal moet neem.
“Ons het darem ook vir Wiehahn Herbst en Julian Redelinghuys, so daar is taamlik diepte onder die stutte.”
Plumtree het ook nie die moontlikheid uitgesluit nie dat daar elders gesoek kan word na ’n loskopstut.
Volgens hom sal die Sharks egter nie vir Eugene van Staden terugkry van sy Franse klub, Biarritz, nie.
“Eugene het gevra om vrygestel te word van sy kontrak met ons en ons sal nie in sy pad staan nie.”
Die Sharks se onderlinge proefwedstryd aanstaande naweek sal nou skielik meer fokus plaas op die stryd in die voorry.
Om die Du Plessis-broers Jannie en Bismarck, asook Mtawarira in die voorry te kon hê, sou ’n groot voordeel gewees het.
Plumtree het ook erken hy moet nog goed sif om sy beste senter-kombinasie, asook slotpaar, te vind voor hul eerste Super-wedstryd, op 24 Februarie teen die Bulls op Loftus Versfeld in Pretoria.
– Sport24
– Bly op hoogte van al die jongste sportnuus deur Nuus24Sport op Twitter te volg