Kings se Super-deelname weer in gedrang
2011-11-16 07:00
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
KAAPSTAD. – Die Southern Kings se insluiting in 2013 se Super Rugbyreeks kan opnuut in die gedrang kom.
Etlike rugbybeamptes is van mening dat die Kings se outomatiese insluiting nie in Suid-Afrika se beste belang sal wees nie.
Die kwessie is op ’n onlangse Presidentsforum van die Suid-Afrikaanse Rugbyunie (Saru) geopper en kan in die eerste week van Desember op die spits gedryf word.
Die OP-Kings se onvermoë om die Curriebeker-reeks se Eerste Liga vanjaar te wen en ’n gebrek aan noemenswaardige transformasie op die speelveld is van die redes wat aangevoer word.
Boonop is twee Nieu-Seelanders – Ross Kennedy en Clint Newland – vanjaar deur die OP-Kings ingespan.
“Is ’n Kiwi (Nieu-Seelander) ’n Oos-Kaapse boorling?” wou ’n rugbybeampte tong in die kies van Sport24 verneem.
Sanzar, die beheerliggaam vir rugby in die Suidelike Halfrond, het ook vroeër vanjaar by monde van sy uitvoerende hoof, Greg Peters, gesê dat die uitbreiding van Super Rugby nie op die sakelys is nie.
Dit laat Suid-Afrikaanse rugby weer met die dilemma dat die Kings nie ingepas kan word sonder dat ’n bestaande SA Super Rugbyspan in die slag bly nie.
Die spanne uit die Oos-Kaap se vertoningslys op die veld is ’n kopseer.
Die OP-Kings het sleg in die Eerste Liga se eindstryd teen die Boland verloor. Met die SWD en die Grens se posisies onderaan die Eerste Liga se puntelys bygereken, beteken dit dat die Southern Kings uit spelers van Suid-Afrika se 10de, 13de en 14de beste provinsiale spanne sal bestaan.
Suid-Afrika se verantwoordelikheid teenoor Sanzar om sy beste spanne Super Rugby te laat speel, kan óók as argument teen die Kings geopper word.
Een van die moontlikhede is dat die Kings eerder die geleentheid gegun moet word om vir 2013 se toernooi te kwalifiseer.
Presies hoe dit sal geskied, is egter onseker.
“Daar moet ook gekyk word na die ander span wat met die Kings se insluiting geraak sal word. Die besluit moet in Suid-Afrikaanse rugby se beste belang wees,” is aan Sport24 gesê.
Die politieke dimensie aan dié debat is ook baie ter sake omdat die Oos-Kaap se insluiting bevorderlik vir transformasie kan wees.
Die gekleurde spelers wat vanjaar gereeld vir die Kings gespeel het, is Norman Nelson, Mpho Mbiyozo, Siyanda Grey, Tiger Mangweni, Mzwandile Stick, Andile Witbooi, Boela Abrahams en Marcello Sampson.
Michael Green berig dat Grey deur die loop van die seisoen beseer is, maar die streek se beste senter en dus ’n seker keuse was. Stick is gepos omdat sy spelpeil swak was. Die stut Pumlani Nodikita, wat waarskynlik ook gereeld sou speel, het vroeër vanjaar sy nek gebreek tydens die Nasiesbeker-toernooi in Roemenië. Die Kings het daardie toernooi gewen.
– Sport24
– Bly op hoogte van al die jongste sportnuus deur Nuus24Sport op Twitter te volg