Kan die Stormers geskiedenis maak?
2010-05-22 09:42
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad - Ná 14 seisoene, 166 wedstryde, 13 280 minute se rugby en verskeie naam- en trui-veranderinge, kry die Stormers vanaand die kans om geskiedenis te maak deur die eerste keer die eindstryd van ’n Super-reeks te haal.
Die Waratahs is op Nuweland hul teenstanders, met die wenner wat volgende naweek in die eindstryd teen die Bulls of die Crusaders speel.
In die beroepsera het die Kapenaars hul reistog in Super-rugby in 1996 sonder welslae as die Westelike Provinsie begin, in 1998 het hulle as die Western Stormers teruggekeer nadat hulle in 1997 nie deelgeneem het nie, en het hulle uiteindelik in 1999 eers die Stormers geword.
Vir al die talentvolle spelers wat die streek al opgelewer het, is die harde werklikheid dat die rekordboeke ’n treurige verhaal vertel.
Al wat van 1998 onthou kan word, is snaakse truie en die Stormers se eerste halfeindstryd – in 1999 – het in ’n debakel oor wedstrydgeld en bonusse op die oggend van die wedstryd ontaard.
Dít het dié stryd teen die Highlanders ontspoor.
Die enigste ander halfeindstryd was in 2004 in Christchurch, en dit het ook in ’n nederlaag teen die Crusaders geëindig.
Desnieteenstaande stap meer ondersteuners oor die jare deur Nuweland se hekke as by enige ander Super-span se tuiste.
Dit vertel die verhaal van ’n uiters lojale ondersteunersbasis en dis juis waarom die Stormers se afrigter, Allister Coetzee, trots is op wat sy span vanjaar kon vermag.
“Dis wonderlik vir die Kaap, regtig fantasties,” sê hy oor die Stormers se eerste halfeindstryd op Nuweland sedert 1999.
“Daar was maer jare en vir die geharde WP-ondersteuner, wat selde iets gehad het om oor te skree, is dit veral goed. Dis waarom ek so trots op die span is – dat ons die stoere ondersteuner kon gelukkig maak.
“Die opgewondenheid in die Kaap is fantasties. Die Kaap en sy mense verdien dit.”
Coetzee het egter al ná verlede week se sege oor die Bulls gesê dat die Stormers tot op hede nog niks bereik het nie.
Klop hulle die Waratahs, sal dit ’n roemryke stukkie geskiedenis in Kaapse rugby wees. Die Stormers sal deur meer as 48 000 fanatiese ondersteuners aangepor word.
“Dis wonderlik om op ’n volgepakte Nuweland te kan speel. ’n Ou kry eintlik hondervleis, maar die spelers weet dat sodra hulle op die veld kom, dit net die basiese dinge is wat gaan tel.
Jy moet fokus om jou bal in die lynstane te wen, besit te behou en seker maak jou speldissipline is uit die boonste rakke,” sê die breier.
“Dit gaan oor jou posisionering, om nie strafskoppe af te staan nie en dat eerstefase-besit in die lynstane en skrums nie onderhandelbaar is nie.
Jy kan nie die bal direk uitskop van buite jou kwartgebied nie en moet seker maak jy verbrou nie ’n doodvat nie. Ek verwag dieselfde hoë werkverrigting op verdediging as wat nog heel jaar die geval was.”
Sou dinge ontspoor, gaan dit nie weens ’n moontlike staking wees nie. Daar is geen sprake van ’n geldtwis soos 11 jaar gelede nie nie.
Die Stormers is eenvoudig reg om alles te gee om geskiedenis te maak.
- Sport24
Bly op hoogte van al die jongste sportnuus deur Nuus24Sport op Twitter te volg.