Kampioen-Bulls!
2010-05-30 06:55
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Orlando - Skitterend Bulls. Heita Bulls. iNgangalala Bulls. Watter taal jy ook al
wil gebruik om dié span mee te besing, doen dit gerus nadat hulle twee
jaar ná mekaar hul heerskappy as die voorste span in die
Super14-kompetisie bevestig het.
Boonop glimlag Suid-Afrikaanse
rugby breed en kan nou ná ’n skouspelagtige en geskiedkundige eindstryd
rustig die stokkie vir sokker aangee om die land vir die volgende maand
of wat die sport-bewerasies te gee.
Nie net het die gesogte
Super14-trofee hier gebly met die Bulls se 25-17-oorwinning oor sy
landgenote die Stormers nie, die spel het nóg reuse-spronge gemaak in sy
strewe om een vir almal te word.
Gisteraand was die
Orlando-stadion uitverkoop, uit sy vel, en die hele Soweto blou.
Pres.
Jacob Zuma en sy sport-ministers was hiér om aan eie bas te voel en te
sien wat die spel sonder enige politieke inmenging kan regkry.
Die
Bulls het geen twyfel gelaat oor wie die kitaar slaan aan die plaaslike
rugbyfront nie. Die Super14-trofee, Curriebeker én Vodacombeker staan
in die vertoonkas.
Selfs dít het waarskynlik nie dieselfde impak
gehad as die besluit om rugby Soweto toe te bring nie.
Daar was
weer vervoerprobleme, maar dié keer het vele toeskouers plaaslike taxi’s
opkommandeer en ná ’n kuier by nabygeleë sjebiens die stadion volgepak.
Op
die veld was sake reeds in die eerste helfte gewen met die Bulls wat
16-3 voor was.
Die puntemasjien Morné Steyn het vroeg sy span
laat voorloop met ’n strafdoel en nadat Francois Hougaard goed 40 m deur
die Stormers gewals het, was die skrif aan die muur.
Die Bulls
was begeesterd en klinies en het eers ná ’n halfuur sy eerste strafdoel
afgestaan.
In die tweede helfte het Bryan Habana (wie anders?) ’n
aangee van Morné Steyn onderskep en deurgedraf om skielik sy span nuwe
lewe te gee en binne trefafstand te bring.
Dit het egter die
Bulls aangevuur en Steyn het die Bulls-oorheersing in die skrums deeglik
uitgebuit deur een strafdoel ná die ander deur die pale te jaag.
Die
besoekers het egter tot die einde geveg en ’n tweede drie gaan druk.
Maar toe was die vreugdevure al lankal braaivleiskole.
Die Bulls
se tweede agtereenvolgende Super14-oorwinning is ’n stukkie goeie
geskiedenis, en die Stormers kan net voortbou op hul eerste verskyning
ooit in ’n Super14-eindstryd.
- Rapport
Vir meer hieroor, besoek Rapport.