Kaartjie-stormloop laat stelsel byna knak
2010-05-20 06:48
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kobus Pretorius, Die Burger
Kaapstad - ’n Geweldige aanvraag na kaartjies was die rede waarom die kaartjiestelsel vir die halfeindstryd tussen die Stormers en die Waratahs Dinsdag grootliks verlam is.
Ten spyte hiervan is al die kaartjies vir die Stormers se eerste tuis-halfeindstryd sedert 1999 in ’n dag uitverkoop.
Die kaartjiekantoor by Nuweland en Computicket het egter erge vertragings met hul stelsel ervaar.
Volgens Gavin Lewis, woordvoerder van WP-Rugby, is die rede hiervoor die “geweldige verkeer” wat die stelsel ervaar het van mense wat kaartjies koop.
“Ons besef ondersteuners moes in toue staan om kaartjies te koop en vra om verskoning hiervoor. Ons het voor die kaartjieverkope vir die halfeindstryd ’n nuwe bediener aangeskaf.
“Ons is ook besig om na maniere te kyk om die stelsel te verbeter.”
Sarita van Wyk, kommunikasiebestuurder van die Shoprite-groep, wat Computicket besit, het gesê die probleme wat op die Computicket-stelsel ontstaan het, was weens die onvermoë van die Nuweland-kaartjiestelsel om ’n klomp transaksies tegelykertyd te verwerk.
“Die Computicket-stelsel het nie in duie gestort nie. Wanneer Computicket kaartjies namens Nuweland verkoop, word die kaartjies nie op Computicket se eie stelsel gedra nie, maar moet Computicket skakel met Nuweland se stelsel deur ’n afstandskakel.
“Nuweland se kaartjiestelsel het gister gewankel onder die druk van die geweldige aanvraag na kaartjies, en die opeenhoping van transaksies het veroorsaak dat die diensgehalte van Computicket beïnvloed word.”
Sy het gesê ondanks die stadige spoed van die stelsel het Computicket sy totale 9 000 kaartjies vir die halfeindstryd teen gisteroggend 08:00 uitverkoop.
“Computicket is gereeld in konsultasie met WP Rugby oor die kaartjieprobleme,” het sy bygevoeg.
Daar kan moontlik vandag nog ’n klein getal kaartjies aan Computicket beskikbaar gestel word vir die Stormers se wedstryd. “Dit is egter baie min, so mense moenie te opgewonde raak nie,” het Lewis gesê.
’n Aankondiging sal vandag op die Stormers se webwerf, www.iamastormer.com, gedoen word.
Ondersteuners by albei Super14-halfeindstryde in Kaapstad en Soweto kan hulself gereed maak vir goeie weer, berig François Haasbroek.
Nuweland, bekend as die natste voorstad van Kaapstad, gaan die droogste en warmste rugbyplek van die naweek wees.
-Sport24
Bly op hoogte van al die jongste sportnuus deur Nuus24Sport op Twitter te volg.