Juan weer op krukke
2012-01-27 07:00
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein – Die Springbok-flank Juan Smith het Woensdag in Pretoria ’n opvolgoperasie aan sy haksening ondergaan, maar volgens Ian Morris, die Cheetahs se spandokter, is daar nie rede tot groot kommer nie.
Hoewel Smith se terugkeer vertraag is en hy nou die Cheetahs se oorsese toer in die Super-rugbyreeks kan misloop, sal dié verdere voorsorg hopelik verhoed dat hy later ongemak verduur.
Ondanks sy vierde operasie, waarin slegs steke in een verwyder is, is dié dokter “positief en optimisties” dat die flank op pad terug speelveld toe is.
Volgens Morris moet Smith, wat vir eers op krukke is, se wonde nou genees en sal hy oor sowat twee of drie weke weer aan die gang wees.
Die nuwe Springbok-afrigter, wat vandag aangekondig word, sal boonop ook hoop die 30-jarige Bok kan so gou moontlik terugkeer, aangesien hy en die Stormers-kaptein, Schalk Burger, die gunstelinge vir die Bok-kapteinskap is.
Smith het sy haksening in 2011 seergemaak en aan die begin van Januarie weer begin hardloop.
Hy het Maandag ’n spesialis in die Jakarandastad gaan sien nadat hy steeds ’n bietjie pyn verduur het.
’n Skandering is gedoen en daar is besluit om eerder vroeër as later wanneer hy op die veld is en dalk pyn het, te opereer.
“Die skandering het gewys daar is ’n bietjie letselweefsel sigbaar. Dus is besluit om eerder weer oop en skoon te maak.
Hy moet nou net herstel van die operasie en dan gaan ons weer vorentoe,” het Morris gesê.
Smith se besoek aan die spesialis het ook veroorsaak dat hy nie vandeesweek die Cheetahs se oefenkamp in Jeffreysbaai meegemaak het nie.
Leon Karemaker is in sy plek vir die oefenkamp ingesluit en hoop hy kry kans in ’n oefenstryd.
Daar is eers gehoop Smith sal vir die Cheetahs se eerste Super-wedstryd, op 25 Februarie teen die Lions in Johannesburg, reg wees, maar dis nie meer ’n haalbare doelwit nie.
Dié operasie kan selfs beteken dat hy die Cheetahs se oorsese toer misloop, maar dis dalk ’n bedekte seën dat hulle vroeg toer.
Dit gee Smith ekstra tyd om te herstel en om hom hopelik by sy spanmaats aan te sluit wanneer hulle terugkeer.
Die Cheetahs speel slegs hul eerste twee wedstryde, teen die Lions en op 3 Maart hier teen die Bulls, in Suid-Afrika voor hulle op die vliegtuig klim.
– Sport24
– Bly op hoogte van al die jongste sportnuus deur Nuus24Sport op Twitter te volg