Juan se opvolger bekend
2010-04-09 09:58
In-diepte Verslae
Gebruik die grys stof tussen jou ore en hou die gewig wat jy in die gimnasium kan opstoot eerder in die agterkop.
Dewaldt Duvenage se “drie” wat nie vroeg in Saterdag se Super Rugbywedstryd tussen die Stormers en Crusaders toegeken is nie, moes gestaan het.
Bloemfontein - Die flank wat die laaste paar maande onder groot geheimhouding deur die Cheetahs as Juan Smith se opvolger grootgemaak word, Philip van der Walt, kan noodgedwonge vroeër deur dié Super14-rugbyspan losgelaat word.
Die 20-jarige Van der Walt het gister na Canberra gevlieg om hom by die Cheetahs aan te sluit nadat Smith hom weens die afsterwe van sy pa aan môre se wedstryd teen die Brumbies onttrek het.
Van der Walt sal wel geen rol teen die Brumbies speel nie, maar kan ’n week later in Christchurch teen die Crusaders in Smith se nr. 7-trui losgelaat word.
Soos Smith is Van der Walt groot en sterk, humeurig en ’n speler met min woorde van die speelveld.
“Ek sien baie van Juan in Philip, veral van ’n Juan in sy jonger speeldae,” sê Naka Drotské, afrigter van die Cheetahs.
Die rooikop-flank is in Adelaide gebore en het die Oostelike Provinsie in 2007 se Cravenweek-toernooi vir hoërskole verteenwoordig, waarna hy in 2008 en 2009 vir die Vrystaatse o.19- en o.21-spanne uitgedraf het.
As een van die sterre wat die Vrystaat verlede jaar op Loftus Versfeld gehelp het om die nasionale o.21-titel te verower, is Van der Walt vanjaar in die span van die Blitsbokke ingesluit waar hy waardevolle ervaring op internasionale vlak opgedoen het.
Van der Walt het ook die laaste tyd vir die Vodacombeker-span van die Vrystaat diens gedoen en sou juis môre in Ravensmead in Kaapstad teen die Pampas-vyftiental speel. Van der Walt is, soos Smith, ’n sterk baldraer en is bekend vir sy aggressiewe lakwerk.
In Smith se afwesigheid sal Adriaan Strauss (haker) die Cheetahs se kapteinskap teen die Brumbies oorneem.
Barend Pieterse skuif noodgedwonge van slot na flank, met Izak van der Westhuizen wat môre die 11de speler van die Cheetahs sal word wat sy Super14-buiging in 2010 maak.
Nico Breedt sit nou in Van der Westhuizen se plek op die plaasvervangersbank.
“Juan se onttrekking is uiteraard ’n yslike terugslag vir ons,” sê Drotské.
Sekere kenners meen die Cheetahs se kans om teen die Brumbies te verras, is nou finaal deur Smith se onttrekking by die agterdeur uit. ’n Sege deur die Cheetahs word in die afwesigheid van Smith en beseerdes soos Heinrich Brüssow, Frans Viljoen en Lionel Mapoe selfs as ’n onmoontlike teen die Brumbies beskou.
Die Cheetahs kon nog nooit in die Super14-reeks oorsee seëvier nie en met teenstanders soos die Brumbies, Crusaders en die Chiefs is dit onwaarskynlik dat die sentrale streekspan dié saak nou in die afwesigheid van verskeie sterre sal kan regstel.
* Goeie nuus vir die Cheetahs is dat hul een Bok-flank, Hendro Scholtz, gister tydens hul laaste oefening in Sydney fiks verklaar is. Scholtz vorm die lostrio saam met Pieterse en ’n derde Bok, Kabamba Floors.
- Sport24