Jean voorspel Nuweland-wenner
2010-05-22 13:58
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell
Kaapstad - Daar is nie ’n enkele swak plek in die Stormers se mondering nie en Jean de Villiers sien nie hoe hulle vandag se Super14-halfeindstryd teen die Waratahs op Nuweland kan verloor nie.
“Die een ding wat vir my van die Stormers uitstaan, is hul diepte. Daar is geen ooglopende swakplek in die span nie. Van die skrums tot die lynstane en afbreekpunte is ons werklik goed,” het die oudkaptein van die Stormers en Springbok-binnesenter Vrydag uit Ierland gesê.
“Francois Louw speel uitstekende rugby en die lostrio speel goed as ’n kombinasie. Die Stormers speel ook aanvallende rugby met Mossie (Jaque Fourie) en Bryan (Habana) agter. Bash (Peter Grant) vaar ook baie goed.”
De Villiers is klaar met sy verpligtinge by die Ierse streekspan Munster en sal eersdaags na Suid-Afrika terugkeer.
Die verwagting is dat hy vir die Westelike Provinsie in die Curriebeker-reeks beskikbaar gaan wees en weer aanstaande jaar vir die Stormers sal speel.
Ofskoon die Waratahs later in die Super14-reeks meer aanvallende rugby begin speel het as toe hulle vroeër vanjaar met 6-27 teen die Stormers op Nuweland verloor het, verwag De Villiers die aard van die stryd kan hulle noop om konserwatief ingestel te wees.
“Dis belangrik om wenrugby in uitklopwedstryde te speel en hulle kan ’n bietjie meer konserwatief wees. As daar swak skoppe is, sal dit vir Gio Aplon, Joe Pietersen en Bryan Habana kanse op die teenaanval bied.
“As die Stormers hulle met goeie verdediging frustreer, behoort daar ook kanse vir omkeerbesit te kom. Ek kan nie sien dat dit enigiets anders as ’n sege vir die Stormers sal wees nie.”
Die Waratahs is onder andere sonder die beseerde Wallaby-loskopstut Benn Robinson en dit bied straks aan die Stormers ’n goeie kans om hul skrum aan te val.
Wicus Blaauw het teen die Bulls teruggekeer, wat die tuisspan se skrum op die regte tyd versterk het.
Die besoekers is ook sonder die Wallaby Wycliff Palu.
“Dis altyd moeiliker as jy twee internasionale spelers soos Robinson en Palu (agtsteman) verloor, maar die Waratahs vaar tot dusver baie goed sonder daardie supersterre,” sê die Stormers se kaptein, Schalk Burger.
Die Stormers het laas in 2004 in ’n halfeindstryd gespeel, maar daar is geen gebrek aan ervare spelers wat al die groot oomblik meegemaak het nie.
Burger, Habana en Fourie was in Suid-Afrika se span wat die Wêreldbeker-toernooi in 2007 gewen het. Habana het ook twee Super14-titels in ’n Bulls-trui verower.
Spanne:
Stormers: Joe Pietersen, Gio Aplon, Jaque Fourie, Juan de Jongh, Bryan Habana, Peter Grant, Dewaldt Duvenage, Duane Vermeulen, Francois Louw, Schalk Burger (k), Andries Bekker, Adriaan Fondse, Brok Harris, Tiaan Liebenberg, Wicus Blaauw.
PLAASVERVANGERS: Deon Fourie, Eusebio Guinazu, Anton van Zyl, Pieter Louw, Ricky Januarie, Willem de Waal, Tim Whitehead.
Waratahs: Kurtley Beale, Lachie Turner, Rob Horne, Tom Carter, Drew Mitchell, Berrick Barnes, Luke Burgess, Ben Mowen, Phil Waugh (k), Patrick McCutcheon, Kane Douglas, Dean Mumm, Al Baxter, Tatafu Polota-Nau, Dan Palmer.
PLAASVERVANGERS: Damien Fitzpatrick, Jeremy Tilse, Chris Thomson, Dave Dennis, Josh Holmes, Daniel Halangahu, Rory Sidey.
Afskop: 19:10.
- Sport24
Bly op hoogte van al die jongste sportnuus deur Nuus24Sport op Twitter te volg.