Jake sal spelers lok, glo Giteau
2011-05-04 09:57
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Die aanstelling van Jake White as hoofafrigter van die Brumbies sal die werwing van spelers makliker vir dié Australiese span maak.
Só sê die Brumbies-kaptein en Wallaby-senter, Matt Giteau, nadat White verlede week vir die volgende vier jaar as die Brumbies se breier aangestel is. White was in 2007 die Springbok-rugbyspan se afrigter toe hy die Wêreldbeker verower het.
Hoewel Giteau nie deur White afgerig sal word nie en daarom nie ywerig was om vrae oor White se aanstelling te beantwoord nie, meen hy dit kan spelers na die Brumbies lok.
Die 28-jarige Giteau sluit hom ná vanjaar se Wêreldbeker-toernooi by die Franse klubspan Toulon aan.
“Die grootste prys in wêreldrugby is die Wêreldbeker. Jake het ’n span dit help verower en ’n mens moet natuurlik weet wat jy doen om dit te vermag. Vir my as speler is sy aanstelling egter irrelevant. “Dis seker goed vir die Brumbies om te weet dat hulle êrens heen op pad is en dit maak werwing ook makliker as jy ’n hoofafrigter het.
“Maar vir nou is ons grootste uitdaging egter net om ’n sege te behaal,” het Giteau ná die Brumbies se nederlaag van 36-47 hier teen die Cheetahs gesê.
Benewens Giteau sal die veelsydige agterspeler Adam-Ashley Cooper ook die Brumbies verlaat. Cooper sal hom by die Waratahs aansluit en White sal daarom minstens twee staatmakers kwyt wees.
Die Aussies vaar nie vanjaar volgens hul hoë standaarde te waffers in die Superreeks nie. Hulle het net twee seges in nege kragmetings behaal en lê 10de op die algehele puntelys.
Die span het Andy Friend ook vroeër in die reeks op aandrang van die spelers as breier gepos.
Giteau het gesê White se aanstelling is nie juis in die Brumbies-kamp bespreek nie en dat sy span eerder op 2011 wil fokus.
Die Brumbies speel Saterdag teen die Sharks in Durban.
“Daar is vlugtig daaroor (White se aanstelling) met die span gepraat.
“Maar vir my en Tony (Rea) maak dit nie eintlik saak nie, want ons is net hier vir hierdie jaar. Ek gaan Frankryk toe. Dis goed dat die Brumbies in ’n rigting beweeg en ek is seker hulle is tevrede met die aanstelling.
“Baie mense het vanjaar gesê wat ons moet doen en wie ons moet inbring en dit was baie moeilik vir die afrigtingspan. Maar vir my was dit lekker om saam met Tony en die afrigtingspan te werk en ons kyk nie nou enigsins verder nie.
“Die grootste uitdaging is om volgende week (dié week) goed te speel en om nie te veel bekommerd te wees oor wie ons volgende jaar afrig nie.”
Vir die jongste sportnuus volg Nuus24Sport op Twitter.
- Sport24